فضلت جبانة سقارة في منطقة الجيزة، غرب القاهرة، لآلاف السنين مدينة الموتى وأرض الدفن المقدسة لعاصمة مصر القديمة ممفيس، وبتكشف لنا كل يوم عن كنوز أثرية جديدة. وواحد من أخر الكنوز اللي اكتشفتها البعثة الأثرية المصرية برئاسة الدكتورة علا العجيزي هي مقبرة لواحد من كبار رجال الدولة في عصر الملك المصري رمسيس التاني.
وضح بيان وزارة السياحة والآثار، يوم الاتنين إن التابوت المُكتشف مصنوع من الجرانيت الوردي، وأكدت البعثة الأثرية التابعة لجامعة القاهرة إن التابوت تابع لشخص اسمه بتاح – إم – ويا، وهو واحد من كبار رجال الدولة في عهد الملك رمسيس التاني.
أما مصطفى وزيري، الأمين العام للمجلس الأعلى للآثار في مصر، قال في بيان إن أهمية الاكتشاف ده هي المناصب المهمة اللي كان صاحب المقبرة بيشغلها في البلاط الملكي، واللي منها الكاتب الملكي، وكبير المشرفين على المواشي ورئيس الخزانة في معبد الملك رمسيس التاني.
وفي بيان صادر من الوزارة اتضح إن التابوت المكتشف كان فيه كسر، وأكد البيان إنه ممكن يكون دليل على إن المقبرة اتفتحت قبل كده واتعرضت للسرقة في العصور القديمة.
زاهي حواس يدعي إنه على أعتاب اكتشاف مومياء الملكة نفرتيتي
نفرتيتي هي زوجة الملك أمنحوت الرابع، اللي كان الملك العاشر في الأسرة الـ18 وحكم مصر لمدة 17 سنة من 1353 لـ1336 قبل الميلاد. وقام بثورة دينية ضخمة في مصر القديمة، دعى فيها لترك عبادة الآلهة المصرية وعبادة قرص الشمس اللي سماه آتون، ولقب نفسه بإخناتون، أي المخلص لآتون.
دعمت نفرتيتي زوجها الحبيب في دعوته الدينية الجديدة، رغم خطورة الموقف وآثاره الكارثية على الوضع الاقتصادي والسياسي ونتائجه الخطيرة في زعزعة استقرار المملكة، ورغم معارضة كهنة أمون وباقي المعابد المصرية للدعوة الدينية الجديدة.
مانعرفش عن نفرتيتي كتير، غير إنها كانت قريبة جدًا من زوجها الملك وتم ذكرها في أناشيده وكتاباته كتير جدًا، وكان ليها دور مهم في الفترة المضطربة دي من تاريخ مصر، وكانت ست غامضة وقوية.
وكل اللي وصل لنا من آثارها هو التمثال النصفي اللي تم اكتشافه في سنة 1926 ميلادية، وانتقل للمتحف الجديد في مدينة برلين، عاصمة ألمانيا.
وأكد عالم الآثار المصري، زاهي حواس، إنه اقترب جدًا من اكتشاف مومياء نفرتيتي، بعد ما ربط بين مجموعة اكتشافات لمومياوات في شهر ديسمبر الماضي في وادي الملوك بالأقصر، وقال إن ممكن تكون واحدة منهم هي نفرتيتي، وأكد كمان إنه خلال الشهر القادم هيقدر يكشف عن ممياء عنخ إسن آمون، اللي كانت زوجة الملك توت عنخ آمون.