في يوم الأرض العالمي، إزاي نحافظ على كوكب الأرض؟

قبل ما نقولك إزاي نحافظ على كوكب الأرض، لازم نعرف إيه قصة اليوم ده الأول، يوم الأرض العالمي هو يوم 22 من شهر أبريل، بيحتفل بيه العالم كل سنة بهدف نشر الوعي علشان نحمي الكوكب، وبيحتفل بيه أكتر من 193 دولة على مستوى العالم.

طب هو مين صاحب الاحتفال ده؟ السيناتور جايلورد نيلسون وهو سياسي وبيئي أمريكي وتم الاحتفال بيه أول مرة سنة 1970، طب وليه يوم 22 بالتحديد من شهر أبريل؟ علشان بيمثل فصل الربيع في نصف الكرة الشمالي.

عن: alroeya

طب وإزاي نحمي كوكب الأرض؟

هنقول على خطوات وطرق بسيطة نقدر نعملها كلنا، لإن المسئولية مش بس في الحكومة، لأ احنا كمان لينا دور.

  • إسراف المياه تعتبر كارثة، احنا بنسرف طول الوقت من غير ما ناخد بالنا سواء في الأكل والشرب أو في الاستخدامات الشخصية.
  • حاول بقدر الإمكان إنك تستخدم أكياس وشنط من القماش لاحتياجاتك اليومية، علشان الأكياس البلاستيك ضارة جدًا بالبيئة، ولو ضروري إنك تستخدمها حاول بقدر الإمكان تعملها عملية فصل عن المخلفات علشان تسهل إعادة تدويرها.
  • حاول تهتم بعملية الفصل للقمامة اللي عندك في البيت، بإنك تحط كل حاجة في صندوق منفصل سواء كان زجاج أو بلاستيك أو ورق.
  • زيوت العربيات والمحركات أو أي مواد كيميائية ماينفعش تتخلص منها بإنك ترميها على الأرض، حاول إنك تقوم بتعبئتها وتتخلص منها بشكل آمن.
  • تلوث الهواء كارثة إنسانية مش عارفين نحلها لحد دلوقتي وسببت ظاهرة الاحتباس الحراري، عوادم السيارات ودخان المصانع وغيرها كان السبب الأساسي، علشان كده دلوقتي بيلجأ معظم المنظمات لاستخدام الطاقة النظيفة من الرياح والطاقة الشمسية. واحنا برضه بالتبعية لازم نركز في استهلاكنا على الطاقات النافعة للبيئة، نقلل من استهلاك الكهرباء علشان الفحم والغاز الطبيعي من أكتر الحاجات اللي بتولد كهرباء.
  • الشجر من الحاجات المهمة اللي بتقلل من تلوث الهواء، بإننا نزرع شجر في الأماكن اللي حوالينا، لإن المساحات الخضرا بتمتص غاز ثاني أكسيد الكربون وبتنتج بداله غاز الأكسجين اللي بيساعد في عملية التنفس.
  • قلل من استخدامك للعربية في مشاوريك وحاول تتمشى أو تركب عجل، صحى أكتر وهيقلل من التلوث.
  • حاول تشتري احتياجاتك من أكل وشرب من المناطق المجاورة وابعد عن الحاجات اللي موجودة في أماكن بعيدة علشان تقلل من تلوث الناتج عن مواصلات والعربيات اللي هتنقل الحاجة.
  • حاول تشترك في أي منظمة ليها علاقة بالبيئة كنوع من أنواع الثقافة وبالتبعية تعرف غيرك وتنشر الوعي حوليك.
  • السماد يعتبر طريقة مميزة تقلل من خلالها النفايات وتحسن جودة الأرض، فبدل ما ترمي النفايات حولها لسماد عن طريق تجميعها في صندوق وتسيبها لمدة أسبوع، هتتحول عندك تربة غنية، ممكن تستخدمها في الجنينة عندك فوق الحشائش أو تستغلها في خلق تربة جديدة تزرع بيها حاجات تانية.
عن: al-ain

آخر كلمة: ماتفوتوش قراءة: في اليوم العالمي للمياه.. إزاي نحافظ عليها؟

تعليقات
Loading...
Tweet
Share
Share
Pin