امبارح، يوم 23 من شهر يوليو الجاري كان بيوافق تاريخ ميلاد الفنان أحمد عز. أحمد عز من الفنانين اللي ليهم طابع خاص، من حيث اختياراته للاعمال الفنية والشخصيات اللي بيجسدها. زى ما كتير من الفنانين المقربين منه بيقولوا الفن والتمثيل أهم حاجة في حياته، وده السبب اللي مخليه محافظ على مكانته وكل شوية بيطور في قيمة الأعمال الفنية اللي بيقدمها سواء كانت أفلام أو مسلسلات.
ابتدى عز مشواره الفني عن طريق ظهوره في كليب الفنانة أصالة “لما جات عينك في عيني”، ومن بعدها بدأ يتعرف وكانت أول بطولة ليه في فيلم مذكرات مراهقة.
أعماله في الأول كان معظمها رومانسية ولكنه اتجه بعدها لنوعية مختلفة من الأعمال اللي بتميل للإثارة والتشويق. واحتفالًا بعيد ميلاده ومشواره الفني الحافل، تعالوا نفتكر مع بعض أبرز أعماله السينمائية والدرامية..
مسلسل ملك روحي – 2003
من أوائل المسلسلات اللي كانت من بطولة أحمد عز، وبالرغم من انه مظهرش في كل الحلقات علشان بيتقتل في نص المسلسل ولكن دوره كان كبير ومؤثر، ومن وقتها بدأ يصبح له شعبية ومعجبين بسبب كاريزمته وموهبته الفنية.
فيلم حب البنات – 2004
مين فينا مبيحبش الفيلم ده؟ فيلم حلاوته في بساطته والروح الحلوة اللي فيه اللي بتخلي الناس بعد مرور 15 سنة على عرضه، لسه بيحبوه وبيتفرجوا عليه.
فيلم سنة أولى نصب – 2004
من أفلام البطولة الجماعية اللي حققت نجاح كبير وكان من نوعية افلام الكوميديا الخفيفة والرومانسية. فيلم سنة أولى نصب واحد من أكتر الأفلام المحبوبة عند المصريين ولحد دلوقتي لما بييجي على شاشة التلفزيون، مبنقدرش نغير!
فيلم ملاكي اسكندرية – 2005
من هنا نقدر نقول كانت انطلاقة أحمد عز اللي بنشوفه دلوقتي على شاشة السينما والتلفزيون. في سنة 2005 غير عز من أنواع الأفلام اللي بيعملها واتجه لنوعية الأفلام اللي ممكن نعتبرها شوية أكشن أو thriller، وقدر الفيلم ده يحقق نجاح كبير جدًا ومن وقتها أحمد عز بقى في مكانة تانية خالص في عالم الفن.
فيلم الرهينة – 2006
من الأفلام اللي حققت نجاح كبير كان فيلم الرهينة اللي تم تصوير معظم مشاهده برة مصر، وكانت القصة والحبكة الدرامية بالإضافة لأداء الأبطال من الأسباب الرئيسية لنجاخ الفيلم.
فيلم 365 يوم سعادة – 2011
رجع من تاني أحمد عز لأدوار الكوميديا والرومانسية في فيلم 365 يوم سعادة مع دنيا سمير غانم وكان الدويتو ده مع باقي طاقم العمل ناجح جدًا.
فيلم المصلحة – 2012
فيلم المصلحة من أقوى الأفلام اللي قدمها عز في مسيرته الفنية واللي كانت بتتكلم عن تُجار المخدرات ورجال الشرطة. الفيلم كان بطولة جماعية بتضم أهم الفنانين زى أحمد السقا وحنان ترك وزينة وصلاح عبدالله، وبنشوف إزاى خلال أحداث الفيلم بيحصل صراع بين رجال الشرطة وتاجر المخدرات وأخوه الهارب من قضية قتل.
ولاد رزق الجزء الأول والتاني – (2015 و2019)
على الرغم من إن إحنا مكناش متعاودين نشوف عز في النوع ده من الأفلام، إلا إنه لاقى نجاح كبير واستحسان عند الجمهور، خصوصًا عند الطبقات البسيطة اللي كانوا بيمثلوها خلال أحداث الفيلم. ويعتبر واحد من أكتر الأفلام اللي نجحت وسمعت عند الناس لدرجة إنهم عملوا جزء تاني من الفيلم بعد 4 سنين.
فيلم الممر – 2019
الممر كان من بطولة أحمد عز وإياد نصار وهند صبري ونخبة كبيرة من الفنانين، واللي كان بيسلط الضوء على المخاطر اللي تعرضلها الجيش المصري والأزمات النفسية وقت نكسة 1967 وبطولاته في حرب أكتوبر سنة 1973، وحقق نجاح كبير في السينما.
مسلسل هجمة مرتدة – 2021
آخر مسلسل شوفناه لعز كان موسم رمضان اللي فات في هجمة مرتدة واللي يُعتبر أول عمل درامي يتناول ملف مخابرات من فترة زمنية قريبة على عكس المسلسلات التانية اللي بتنقلنا أحداث حصلت في حقب زمنية قديمة.