علشان تحلى.. أيام مهمة في حياتك لازم تشاركها مع حد

أحداث ومناسبات كتير بتعدي علينا، في منها السخيفة والحلوة اللي لازم ماتفوتهاش وأنت لوحدك، فكرة إحساس مشاركة الأحداث المهمة في حياتك مع حد أنت بتحبه، بيخلي الحدث ليه معنى تاني وذكرى حلوة بالنسبة ليك، غير لما تعديه كده كأي حدث عادي في حياتك. ولإن الإنسان اجتماعي بطبعه وبيحتاج دايمًا لشركاء يشاركوه فرحته، وده طبعًا من أيام “سيدنا أدم وحواء”، وعلشان كده هنتكلم في المقال عن”أيام مهمة في حياتك لازم تشاركها مع حد.”

أول يوم جامعة

عن: دوشة

مبدئيًا الإحساس والحدث ده مش هيتكرر غير مره واحدة في حياتك، إلا لو أنت نويت تخلص كلية وتخش في التانية، بس غير كده ده حدث مهم في حياتك بكل تفاصيله، في فيلم “اضحك الصورة تطلع حلوة” وقت لما وصل “أحمد زكي” بنته “منى زكي” أول يوم في الجامعة، وصورها أول صورة ليها هناك وقالها “علشان تفتكري أيامك الحلوة ياتهاني”. مش بس أول يوم جامعة، كل لحظة هتعيشها في الكلية لازم تعيشها مع مجموعة، علشان في الغالب دي هتبقى أحلى أيام حياتك.

يوم حفلة تخرج

وده لإننا في الطبيعي مش بنتخرج غير مرة واحدة بس، وفي الغالب احنا متعودين نشارك اليوم ده مع أصحابنا وأهلنا، فرحة الأهل في اليوم ده ماتتوصفش، وأحيانًا هما اللي بيشكروك، مش أنت اللي بتشكرهم، بيشكروك على إنهم عاشوا لحظة فخر بابنهم زيّ دي.

يوم ماتقبض أول مرتب

فرحة أول مرتب بتبقى مختلفة شوية، لإنك بتحس مع الفرحة دي بالمسئولية، إنك خالص كبرت، وبنصحك في يوم زيّ ده ومع أول مرتب ليك، هات لأهلك حاجة هما بيحبوها وكان نفسهم فيها من زمان كنوع من المشاركة.

أول نجاح في حياتك

مش شرط يبقى نجاح في المدرسة أو إنك تجيب تقدير عالي في الجامعة، بس فكرة إنك تحس بالنجاح تجاه أي حاجة بتعملها في حياتك أو حتى كلمة تقدير لأي حاجة بتعملها، ده في حد ذاته إحساس حلو، وهتحتاج تشاركه مع حد.

يوم ولادة أول طفل ليك

أول طفل ليك يوم مهم، هتحتاج تشاركه مع العيلة كلها، ويمكن الحاجات اللي بتتعمل ضمن المناسبة زيّ “السبوع” دي أكبر دليل على إننا عايزين نحتفل بيه مع ناس بنحبهم وبيحبونا.

أيام مهمة في حياتنا بتيجي مرة واحدة بس، ومش ضامنين هنعيشها تاني ولا لأ، لازم نستغلها صح، علشان تبقى ذكرى حلوة بعدين.

أخر كلمة: ماتفوتوش قراءة: 5 حاجات ماينفعش تقولها لصاحبك المكتئب

تعليقات
Loading...