في اليوم العالمي لمنع الانتحار.. ازاي تساعد حد قريب منك لو كان عنده ميول انتحارية؟

أي حد بيعاني من ميول انتحارية بيكون عايش ضغط شديد جدًا لإن الأفكار دي بتكون تقيلة ومستمرة وبتظهر في أشكال واقعية جدًا من الصعب على صاحبها إنه يتجاهلها. الأفكار من النوعية دي بتفضل تتردد في الدماغ وتستدعى صور مش حقيقية من واقع الشخص، صور بتوحي للشخص إن حياته أسوأ من الحقيقة وإنه وحيد في مواجهة حياة صعبة وقاسية، وبتدي له انطباع إن الموت هو المهرب الوحيد من قسوة الواقع اللي عايش فيه.

تعمل إيه لو تعرف عنده ميول انتحارية؟

1 – خليك مساحة أمنة للأشخاص اللي حوليك، وسيبهم يفضفضوا لك

لو تعرف حد قريب منك عنده ميول انتحارية لازم تقرب منه وتديله مساحة أمنة علشان يتكلم معاك ويفضفضلك عن أفكاره دي، لإن الشخص لما بيخلي الأفكار دي لنفسه بتكبر وبتبقى أسوأ بكتير وممكن تخليه يوصل لقرار الانتحار فعلًا.

ماتقللش من التأثير الإيجابي للفضفضة، لإنها ممكن تنقذ حد قريب منك علشان بمجرد إنك اتكلمت معاه.

2 – لما حد يحكيلك عن مشاكله أو اضطراباته النفسية بلاش تزايد على مشاكله

كلنا، بشكل أو بأخر، عندنا اضطرابات نفسية وسلوكية، ومشاكل وضغوطات في حياتنا، سواء مؤقتة أو دايمة. بلاش نقول لحد جاي يفضفلنا عن أزماته أو أفكاره السوداوية، “أنا زيّك أو أنا عندي مشاكل أكتر منك”. بلاش ندخل مع الناس في مسابقة مين مننا عنده هموم أكتر من التاني. لما حد يفتحلك قلبه ويتكلم، اسمعه، واتعامل مع فضفضته دي على أساس إنها أكبر مشكلة في الكون.

الناس مختلفين عن بعض في طرق استجابتهم للحياة اللي حوليهم. يعني ممكن اتنين يتعرضوا لنفس المشكلة أو الضغط بالظبط بس واحد منهم يكون الضرر النفسي الواقع عليه أكبر من التاني، علشان تركيبته النفسية مختلفة. فلازم نراعي الفروقات دي.

3 – شجع الشخص ده إنه يدور على دعم نفسي متخصص

بعض الاضطربات النفسية ممكن تتحل من خلال توافر الدعم النفسي من ناحية الأصدقاء والعيلة والفضفضة، لكن لما توصل الاضطرابات دي لأفكار انتحارية حقيقية وواضحة وسوداوية، لازم الشخص يدور على دعم نفسي متخصص في صورة طبيب أو أخصائي نفسي. وعلشان كده لو حد صارحك إن عنده ميول انتحارية أو بيفكر ينتحر بالفعل ماينفعش تكتفي بسماعه والطبطبة عليه وشوية نصايح، في الحالات دي لازم تنصحه يدور على دعم نفسي متخصص.

4 – تابع مع الشخص ده واسأل عن حالته النفسية طول الوقت

الميول الانتحارية بتتطور من مجرد أفكار عابرة لقرارات ومحاولات حقيقية للانتحار، فلازم طول الوقت نقف جنب الشخص اللي بيعاني منها ونديله مساحة يتكلم ويحكيلنا عن أفكاره واضطراباته النفسية علشان مايخدش قرار ممكن يخلينا نخسره.

5 – افصل نفسك عن فضفضة الأشخاص المضطربين حوليك

لما بنحول نفسنا لمساحة أمنة للأشخاص اللي حولينا بنلاقي نفسنا بنسمع عن مشاكل واضطرابات كتير، وبنلاقي كمية كبيرة جدًا من السوداوية اللي ممكن تؤثر على حالتنا النفسية وتسبب اضطرابات نفسية عندنا.

لازم ندي نفسنا فرصة نفصل فيها من دورنا كمساحة أمنة، وناخد أجازات مانسمعش فيها فضفضة من حد، والأهم إننا نتعلم ازاي نفصل ما بين ذاتنا وما بين مشاكل الناس اللي بتفضفض معانا. لازم نكون مساحة أمنة لنفسنا قبل الأخرين ونتعلم نطبطب على نفسنا وندور على مساحات أمنة في أشخاص تانية وناخد دورنا في الفضفضة والطبطبة.

أرقام ممكن تتواصل معاها لو عندك ميول انتحارية

ممكن تتواصل مع أرقام مراكز متخصصة في الدعم النفسي للأشخاص اللي عندهم ميول انتحارية على الأرقام دي:

762 1602

762 2381

دول الهوت لاينز المتخصصين في الدعم النفسي لمنع الانتحار في مصر.

آخر كلمة: ماتفوتوش قراءة: 5 حاجات ماينفعش تقولها لصاحبك المكتئب

تعليقات
Loading...
Tweet
Share
Share
Pin