في اليوم العالمي لمرض السكر: ازاي نقلل من احتمالية الإصابة بالمرض

نمط الحياة له عامل مهم جدًا في تجنب الإصابة بمرض السكر، وفي حاجات بنعملها على مدار يومنا ويوميًا مش بنبقى عارفين أو حاسين هي هتضر صحتنا قد إيه، وده لإن أعراضها مش بتكون ظاهرة على المدى القريب ومش بنحس بها غير بعد فترة. فبنتمادى فيها، لحد ما بنصحى الصبح نلاقي نفسنا بنعاني من أعراض لأمراض ماكناش متخيلين إنها تبقى عندنا، وكل ده بسبب نظام الحياة والأكل الغلط، ومن ضمن الأمراض اللي بيسببها نمط الأكل الغلط هو مرض السكر، وفي اليوم العالمي له حبينا نقول مجموعة من النصائح اللي ممكن تكون بسيطة بس هتفرق في تجنب الإصابة بالمرض.


طبق السلطة شيء أساسي في الوجبة

لازم نتعود في أي وجبة لنا إن يبقى فيها طبق سلطة لإنك حرفيًا تقدر تجمع فيه أي نوع خضار أنت بتحبه وممكن تغير في مكوناته كل يوم علشان ماتزهقش. ممكن تعمل العادية بالخيار والطماطم، ممكن المرة اللي جاية تدخل فيها بروكلي أو رمان ومرة تزود جزر وتفاح وهكذا علشان ماتحسش بالزهق. وفي نفس الوقت سريعة في التحضير ومش هتحتاج وقت ومجهود كبير.

ممارسة الرياضة بشكل منتظم

مانقدرش ننكر إن الرياضة لها فوائدها على كل المستويات سواء النفسية أو الصحية وإنها بتخرج الطاقة السلبية، غير كده فهي بتقدر تقلل من إحتمالية الإصابة بالمرض لإنها بتساعد في تظبيط مستوى السكر في الدم وعمل الإنسولين بشكل أحسن، لإنها بتتخلص من الدهون اللي تراكمها سبب أساسي في إن الإنسولين مايشتغلش كويس في الجسم.

شرب القهوة

شربها من غير أي إضافات يعتبر اختيار مناسب لو عايز تتجنب الإصابة، ده بالنسبة للشخص السليم ولو شربها بكميات معتدلة، بس بالنسبة للشخص المصاب فعلًا في دراسات بتقول إن تأثيره ممكن يختلف من مصاب لمصاب حسب سنه ووزنه ونسبة السكر في الدم عنده عاملة إيه وحالته واصلة لحد فين، بس هو مناسب في المجمل للشخص الغير مريض.

تجنب الوجبات السريعة

الوجبات السريعة الإكتار منها بيعلي من نسبة الكوليسترول في الدم، وبالتالي هيحصل اضطراب في مستوى الإنسولين، ده غير الدهون اللي بتسببها وبتسد الشرايين.

تقليل من شرب السجائر

في تقارير اتعملت من موقع “Diabetes” بتقول إن النيكوتين الموجود في السيجارة بيخلي مستويات السكر في الدم تتقلب بسرعة لإنه بيغير من الطريقة اللي بتستجيب بها خلايا الجسم للإنسولين، ده غير إنه بيزود من الدهون الثلاثية المرتبطة بمقاومة الإنسولين، يعني مع كل نفس دخان بيطلع ومع كل سجارة، في فرصة كبيرة للإصابة بالمرض.

كل دي خطوات بتكمل بعضها وماينفعش نعمل حاجة وننسى التانية، يعني ماينفعش أعمل طبق سلطة جانب أكلة مليانة دهون وكربوهيدرات ضارة وفوق كل ده بتاكلها الساعة 2 الفجر! طبق السلطة بقى هيعمل إيه في كل ده! أكيد وجوده مهم بس لازم نعمل توازن ما بين كل الخطوات.

أخر كلمة: ماتفوتوش قراءة: في اليوم العالمي لمرض المهق: 10 حاجات مانعرفهاش عن المرض ده

تعليقات
Loading...
Tweet
Share
Share
Pin