عيد الحب خلاص على الأبواب، وده التوقيت الرسمي اللي بيحتاس فيه كل المتربطين وهما مش عارفين هييجيوا إيه، ولإن اختيار الهدايا “فن” زي باقي الفنون، جمعنالك أفكار برا الصندوق وغير تقليدية هتبين إنك بذلت مجهود وأنت بتعملها أو بتدور عليها وبعيدة عن الهدايا الكليشيه واللي بتقضي الغرض والسلام أو بتجيبها علشان تزق اليوم معاك.. وفي من الهدايا دي اللي تقدر تعملها بإيدك وتستمتع بكل تفصيلة وفي اللي ممكن تعملها عن طريق أماكن، وهنقولك إيه هي الأماكن كمان.
كتاب شاهد على الذكريات
جمع ألطف وأحلى الرسائل والدردشة اللي بينكم في ألبوم واطبعها، ممكن تعملها زي كتيب صغير أو ألبوم، وعمايله مش صعبه ولا مكلفة، لإن كل اللي عليك إنك تنقي الرسائل وتطبعها عن طريق برنامج (Zapptales) وتقدر كمان تحولها لـ pdf، وفي كمان ميزة إن معاها (QR Code) مش هيخليك تقرا رسايل بس، ولكن هتسمع تسجيلاتكم الصوتية وتشوف الفيديوهات اللي جمعتكم. الطريقة كاملة من هنا
برطمان رسائل الحب
نفس فكرة برطمان السعادة، لكن هيبقى برطمان بمناسبة عيد الحب، وبرضه تقدر تعمله بنفسك وتكتب 365 ورقة صغيرة بعدد أيام السنة عن أسباب بيخلوك مرتبط بالشخص ده، أو عن اعترفات أول مرة تقولها عنه، أو حاجات نفسكم تعملوها مع بعض، في المجمل هتبقى رسائل محتواها كله عن الحب، وتقدر كمان تجيب البطرمان جاهز وتضيف أنت فيه الرسائل اللي كتبتها من مكان متخصص في المنتجات اليدوية، زيّ ماركيتشنو.
بلاي ليست أغاني بشكل مختلف
اعمل قائمة بالأغاني اللي الشخص التاني بيحبها، لكن بشكل مختلف هيخليه يحتفظ بها طول العمر، وده عن طريق إنك تعمل حاجة بشكل يدوي مخصوص زي بوستر أو ميدالية عليها اسم الأغنية اللي بتسمعوها مع بعض على طول، أو بتفكركم بذكرى حلوة بينكم، وبيبقى فيها (QR CODE) تقدر تسمع منها الأغنية، وفي مكان اسمه (the giftery – ذا جيفتري) بيعملها، والحجم الصغير منها في حدود 100 جنيه، أو من مكان اسمه (La vanta – لا فاندا بلانينج).
اكتب على جزع شجرة
من الأفكار التريند دلوقتي الكتابة على جزع شجرة أو الرسم كمان، وده بيرجعنا لعصور قديمة لما كنا بنلاقي أول حروف من أسامي الحبيبة محفورة على الشجر، تقدر تكتب عليها كلمة أو جملة أو ترسم صورة الشخص، وفي أماكن كتير تقدر تعملها لك زيّ فابريكا في المعادي، بس ممكن الأسعار تبقى غالية شوية على عكس باقي أفكار القائمة.
جوابات ترجعك لأيام الزمن الجميل
هتفضل الجوابات من أسمى طرق التعبير عن الحب، وفي أماكن بتعملك جوابات من اـألف للياء من التصميم واختيار الورق اللي هيرجعك سنين لورا وكتابة الشعر عليه، وهتلاقيه كمان مختوم بالشمع الأحمر وكل التفاصيل القديمة، وتقدر تضيف فيها صور ليكم مع بعض.
في مكان أونلاين بيقدم الخدمة دي بأسعار معقولة، متخصص بس في فكرة الجوابات وتفاصيلها وكل اللي مرتبط بها، اسمه (vintage – فينتيج) تقدروا تشوفوا عندهم صور وتصميمات كتير للجوابات.
آخر حاجة ممكن تلجأ لها، إنك تفكر مع نفسك لو كان قال لك قبل كده عن حاجة معينة نفسه فيها تجبها له، هيحس إنك فاكر أهم تفاصيله وبتبذل مجهود في الهدية وفي التفكير فيها، ومش مجرد تقضية واجب كده والسلام.