تطبيق عمره أكثر من 20 سنة ومن المفترض أن مستخدميه وصلوا لـ3 مليار، بس من فترة مش قليلة في ظاهرة جديدة بتحصل على الفيس بوك، سموها بظاهرة الـ”هجرة الجماعية” أو الـ”النزوح الجماعي” لفئة بعينها وهي فئة الشباب، وبدأ الباحثون والعلماء يلاحظوا الحالة الغريبة دي وبدأ يتعمل دراسات نتيجتها بتثبت نفس الكلام، مابقاش فيه شباب زي الأول والأغلبية تيتة وجدو وخالو وخالتو وجوز عمتو وطنط اعتماد صاحبة ماما في الشغل، والشباب لا حس ولا خبر، والسبب يا ترى في إيه؟
إيه اللي حصل مع الفيس بوك؟
الفكرة أن في تطبيقات سوشيال ميديا جديدة وقت ما ظهرت بدأت تلعب أنها تجذب فئة الشباب دي بالتحديد بتقنيات وميزات جديدة مناسبة ليهم أكتر زي انستجرام وتيك توك وسناب شات، مناسبة ليهم ولنمط الحياة السريعة بس حسب بعض الدراسات برضه الفيس بوك ماسكتش وقرر يحسن من نفسه ودرس التركيبة السكانية للمستخدمين، وعرف إيه اللي بيحصل معاهم بالظبط علشان يرجعوا لهم تاني، وبدأ يضيف حاجات كل شوية علشان ترجع أهلها تاني، بس يا ترى هيرجعوا؟
نزلنا الشارع واتكلمنا مع بنات وشباب من فئات عمرية مختلفة، بدأنا بمجموعة من فئة المراهقين الفئة اللي كبروا واتربوا أن الموبايل يبقى هو تسليتهم الوحيدة وأكدوا النظرية اللي بتقول أن الفيس بوك بقى فعلًا موضة قديمة وأنهم دايمًا بيلاقوا عليه أخبار مش مظبوطة الأهل بيقعدوا ينقلوها زي أن “الإندومي بيجيب سرطان”، وفيه منهم اللي قال أن الشخص عايز يبقى فيه حرية بعيدًا عن تحكمات وانتقادات الأهل اللي بتحصل عليه وبالتالي اتجهوا لمنصات زي التيك توك، وفي الفئة الأكبر شوية اهتمامتهم رايحة أكثر للتطبيقات اللي بتفيدهم في الشغل زي لينكد إن، وشايف إن التيك توك أحسن أكثر في البصريات والفيديوهات والتقييمات والانستجرام في الصور وتويتر علشان يعرفوا اللي بيحصل حوليهم.
بس على عكس كل ده فيه ناس لسه بتستخدم الفيس بوك زي الأول ومتأثرتش بموجة تطبيقات السوشيال ميديا الجديدة اللي غزت العالم وده لأن عليهم أهلهم والعيلة وعيلة العيلة، ده غير إنه سهل الاستخدام بالنسبة لهم، أو زي ما بيقولوا كده عشرة، ولما حبينا نشوف الفئات الأكبر سنًا ونتكلم معاهم اكتشفنا إن فيه ناس لسه أصلًا مبدأتش تعيش رحلة التكنولوجيا ولسه هتبدأها من الأول.
النتايج اللي طلعنا بيها لم تجزم كلها إن الفيس بوك بقى موضة قديمة، على الأقل بالنسبة للكام شخص دول، بس الأكيد الدراسات بتقول عكس ده لحد ما، وباعتبار إن التطور لازم يطول أي شيء في الحياة وبما إن الفيس بوك كان أول تطبيق سوشيال ميديا ظهر طبيعي أو من المتوقع أن نوره يبدأ ينطفي بالنسبة لفئة ويفضل ثابت بالنسبة لفئة تانية، زي الياهو ماسنجر والـICQ والـBBM في اللي طول وفي اللي نهايته كانت سريعة .. بس ياترى بقى الدور جاي على مين؟
آخر كلمة: ماتفوتوش قراءة: إنشاء أول مصنع لأجهزة الموجات فوق الصوتية في مصر والشرق الأوسط