سينما السيارات هتفتح قريب أوي في مصر والبحرين ودي كل حاجة محتاج تعرفها عنها

أعلن مول العرب التجاري عن استعداده لتشغيل سينما السيارات في مصر قريب قوي، وده في ظل ظروف من الإجراءات الوقائية ضد فيروس الكورونا، ووقف كل دور العرض السينمائي والمسارح وكل أماكن الترفيه لمدة بتزيد عن الشهرين. وعلشان يزيد حماس الجمهور للفكرة، طلبت إدارة المول منهم على الصفحة الرسمية الخاصة بيه بمشاركتهم في اختيار الأفلام اللي هيتم عرضها والأكلات اللي هيفضلوها أثناء عرض الأفلام.

بواسطة: فيسبوك

وكانت دولة الإمارت هي أول دولة عربية لجأت لسينما السيارات كوسيلة ترفيه بديلة لدور العرض السينمائي العادية، وده بعد ما أعلنت إدارة فوكس سينما دبي في أواخر مايو عن خوض تجربة سينمائية جديدة في موقف للسيارات على سطح مركز مول الإمارات للتسوق. ولتقليل الاتصال والتعامل المُباشر بين الناس، حجوزات السينما دي بيتم عملها على النت، وغير مسموح للأشخاص الخروج من سياراتهم طول فترة عرض الفيلم مع السماح بوجود شخصين فقط في السيارة. ولا يُسمح بدخول الأطفال اللي بتتراوح أعمارهم من 3 لـ 12 سنة أو كبار السن اللي بتتجاوز أعمارهم الـ 60 سنة.

بواسطة: تويتر

وفي البحرين، أعلنت شركة البحرين للسينما برضه عن تطبيق تجربة سينما السيارات على سطح مجمع سيتي سنتر البحرين نهاية شهر يونيو الحالي. وحجوزات السينما هتكون إلكترونية زي دبي، والمكان هيتسع لـ 70 سيارة مع وجود شاشة عرض واحدة، وفي كل سيارة هيكون في شخصين فقط لمشاهدة الفيلم.

سينما السيارات بترجع للعالم بقوة بعد سنين طويلة من اختفاءها بسبب تقدم التكنولوجيا ووجود تحديات وعوائق كتيرة كانت بتواجهها زي الظروف الجوية المُتقلبة اللي ممكن تبوظ عرض الفيلم بسهولة، وتقييد مواعيد العرض بأوقات مُحددة من اليوم، واحتياجها لمساحات كبيرة جداً لتشغيلها.

بواسطة: thoughtco.com

بدأت سينما السيارات في الثلاثينيات من القرن الماضي في الولايات المُتحدة الأمريكية وحققت نجاح كبير أوي وقتها، وانتشرت في العالم كله لدرجة إنه في فترة الخمسينيات والستينيات كان في حوالي 4000 دار لسينما السيارات في الولايات المُتحدة لوحدها. وهي اكتسبت شهرتها الواسعة دي وقتها لأنها كانت بمثابة فرصة كبيرة للعيلة كلها إنها تستمتع بمشاهدة الأفلام وهما مرتاحين في عربيتهم وبتكلفة أقل من تكلفة دور السينما العادية.

وبالنسبة للوطن العربي كانت بداية سينما السيارات في الكويت في السبعينيات من القرن الماضي، وظهرت في مصر في التسعينيات من خلال أحد المشاريع في طريق مصر الاسماعيلية ولكن المشروع وقف بعدها واختفت السينما من الوطن العربي.

بواسطة: gruesomemagazine.com

وزي ما كانت سينما السيارات جزء كبير من حياة مُحبي السينما والأفلام فهي كمان ألهمت كتير من صُناع السينما واتعملت أفلام كتيرة مُعتمدة بشكل أساسي في قصتها عليها، زي فيلم الخيال العلمي “Dead end Drive-in” سنة 1986م اللي بيحكي قصة شباب اتحبسوا جوة دار لسينما السيارات في ظل جو من العنصرية والصراعات.

ومنقدرش ننسى الفيلم الموسيقي والرومانسي “Grease” سنة 1987م بطولة جون ترافولتا وأوليفيا نيوتن اللي كان مُبهر وقتها بقصته الرومانسية والأغاني والاستعراضات في دار سينما السيارات.

آخر كلمة: تفتكروا ظروف العالم الجديدة ممكن ترجعنا إيه تاني من الحاجات اللي بطلنا نستخدمها؟

تعليقات
Loading...
Tweet
Share
Share
Pin