بعد ما مجموعة مطورين في جامعة نيويورك بأبوظبي اشتغلوا على اللهجات العربية، سيري هتكلمك بالعربي!
اللغة العربية فريدة من نوعها ومختلفة عن غيرها، وده بسبب إن في كذا شكل للغة العربية، من الفصحى المستخدمة في المعاملات الرسمية ونشرة الأخبار والطقوس الدينية للهجات المختلفة للدول العربية.
نادر جدًا لما حد بيستخدم اللغة العربية الفصحى في المعاملات اليومية، وممكن عشان كدا تجربة تطبيق اللغة العربية الفصحى مع الذكاء الاصطناعي مكانتش ناجحة وكانت تقيلة على المستخدم، لكن مجموعة من المطورين في جامعة نيويورك فرع أبوظبي شغالين على قاعدة بيانات جديدة فيها كلمات مختلفة من لهجات اللغة العربية في منطقة الخليج العربي عشان يقدروا يخلوا تطبيقات زي سيري للـ iOS وأليكسا لـ أمازون يقدروا يتكلموا عربي خليجي.
نزار حبش، مبرمج لغوي ورئيس قسم علوم الحاسب بجامعة نيويورك بأبوظبي، شغال على موضوع إنه يحاول يخلي الذكاء الاصطناعي يفهم اللهجات العامية ده بقالوا أكتر من سنة، وقدر يجمع مائتين ألف كلمة في قاعدة بيانات سماها “مكنز قمر”، ومنها تطبيقات الذكاء الاصطناعي هتقدر تتوقع كلام باللهجات العامية وتفهم المستخدم لو اتكلم بلغته اليوميه، ومن هنا العرب يقدروا يتعاملوا مع “المساعدين الشخصيين” زي أليكسا، من غير ما يضطروا يتكلموا بشكل “رسمي”، بسبب اللجوء للفصحى.
كتير من العرب بيبصوا للهجات العامية كلغة أدنى من الفصحى، بس اللهجات دي على مر مئات السنين اللي الناس اتكلمت بيها فيهم ممكن نقدر نعتبرها لغات مشتقة من العربي قائمة بذاتها، وحواليها تراثها الفريد من نوعه وثقافاتها المختلفة، اللي كلنا بنحتفل بيها، عشان كدا دي خطوة إيجابية في الطريق الصح، ونتمنى نشوفها مع كل لهجات العربي قريب!