صيام رمضان ليه فوايده الصحية الكتيرة زي تطهير الجسم من السموم بس للأسف بعض الناس اللي عندها مشاكل صحية خطيرة زي مرضى السكر ممكن يعود عليهم الصيام بضرر كبير. نسبة مرضى السكر كبيرة جداً حول العالم، وفي كتير منهم ميعرفوش إنهم عيانين أصلاً، وبتتوقع منظمة الصحة العالمية إن مرض السكر هيبقى سابع عامل مسبب للوفاة في سنة 2030.
احنا جبنا شوية نصايح لمرضى السكر يتبعوها وقت الصيام، وكمان هنحاول نصلح بعض مفاهيم الغلط عن العادات اللي بيتبعها مرضى السكر في رمضان. والمعلومات اللي احنا مستخدمنها واخدينها من مركز السكري الخاص بالكلية الامبريالية للعلوم والتكنولوجيا والطب في لندن “The Imperial College London Diabetes Centre”.
في البداية وبشكل عام، الناس المُصابة بالنوع الأول من مرض السكر بننصحهم بشدة إنهم ميصوموش خالص في رمضان. ولو أنت من مرضى النوع ده وعاوز تصوم، يبقى لازم تعمل ده تحت إشراف طبي دقيق، ولازم تراقب دايماً معدلات السكر في دمك علشان تتجنب أي مخاطر صحية.
ولو انت من مصابي النوع الثاني من السكر، فإنت تقدر تصوم بأمان، بس الصيام ممكن ميناسبش كل المصابين بالنوع ده، وعلشان كده من الضروري إنك تتكلم مع الدكتور بتاعك علشان يقدر يقدملك النصحية المناسبة ليك أو يديلك علاج يساعدك في التحكم في مستويات السكر في دمك وقت الصيام.
الناس اللي عندها سكر لازم يتبعوا نظام غذائي خاص بيهم في رمضان
المعلومة دي مش حقيقية على الإطلاق، إنت لو كنت بتتبع نظام غذائي متوازن في حياتك العادية، وده اللي المفروض كل الناس تعمله سواء كان عندهم سكر أو لا، يبقى إنت، وبنسبة كبيرة، مش هتحتاج تغير مكونات نظامك الغذائي اللي أنت ماشي عليه. وفي الحقيقة، إنت لازم تاكل بالشكل الطبيعي اللي بتاكل بيه في حياتك اليومية، مع بس الاختلاف في اوقات وجباتك، وده أفضل بكتير من تغيير كمية الأكل أو نوعه بشكل كامل.
ومن المهم جداً إن الناس اللي عندها النوع الأول من السكر يعرفوا إن في خطورة أكبر عليهم من مُصابي النوع التاني لو قرروا يصوموا في رمضان، وأي حد عنده السكر لازم يتكلم مع الدكتور المُعالج ليه علشان يستشيره قبل ما يصوم.
مفيش مشكلة لو وقفت جرعات الأنسولين في رمضان
والاعتقاد ده ملوش أي اساس من الصحة وهو خطر كبير على مريض السكر. أنت لازم متوقفش الأنسولين أبداً حتى لو في رمضان، وطبعاً جرعات الأنسلوين والأوقات اللي بتاخدها فيها ممكن تتغير مع تغيير مواعيد الأكل مع الصيام، وعلشان كده لازم تستشير دكتورك في الموضوع ده.
فعلى سبيل المثال، لو انت بتاخد حبوب معينة مع الأنسولين أو الأنسولين بس، الصيام هيتضمن مخاطر إن مستوى الكلوجوز في دمك يزيد أو يقل. وفي الحالات الخطرة ممكن يحصلك الحُماض الكيتوني السكري اللي هو حالة حرجة بتيجي لمرضى السكر وبتتطلب إنهم يتنقلوا للمستشفى للعلاج.
مرضى السكر مش محتاجين يصحوا مخصوص للسحور
السحور قبل الفجر مهم جداً لكل الصايمين، ومينفعش ابداً نقلل من أهميته خصوصاً بالنسبة لمرضى السكر. وده لأن عدم الأكل لساعات طويلة بيزود من خطورة الأصابة بنقص السكر في الدم، وعلشان كده حاول إنك تاكل وجبتك وقت السحور قبل الفجر بحاجة بسيطة، وده أحسن بكتير من الأكل بليل متأخر. وده هيساعد في توازن مستويات الكلوجوز في دمك وقت الصيام.
مش هنقدر نتمرن في رمضان علشان الجو بيكون حر والصيام مُتعب
في الواقع، مُفيد جداً إنك تعمل بعض التمارين البسيطة قبل الفطار في رمضان، وتتمرن تاني قبل النوم، وقبل السحور. رمضان بقاله كذا سنة بيجي في الصيف وأكيد صعب التمرين برا البيت في الحر، وعلشان كده حاول تتمرن جوا البيت زي إنك تطلع وتنزل السلالم بتاعة بيتك. وابدأ براحة وبالتدريج علشان متضغطش على نفسك جامد في أول أيام الصيام.
ومن التمارين المفيدة اللي ممكن تعملها بردو هي إنك تتمشى لمدة 10 دقايق في رمضان، واحسن الاوقات اللي ممكن تعمل فيها كده هي بعد غروب الشمس وقبل الشروق.
الصيام عادي بالنسبة للحوامل من مرضى السكر
بالعكس، الصيام بالنسبالهم خطير جداً، ودايماً الأطباء بينصحوهم إنهم ميصوموش. وبالرغم من كده، في بيقرروا إنهم يصوموا حتى وهما عندهم سكر الحمل، و في الحالة دي هما هيكونوا في مخاطرة كبيرة، وهيحتاجوا عناية خاصة جداً طول شهر رمضان.
فعلى سبيل المثال، المرأة الحامل بيقاوم جسمها عملية إفراز الأنسولين فيه، وفي فترة الصيام مستويات الكلوجوز في الدم بتقل عند كل الناس. وبعد الأكل نسبة الأنسولين والسكر في الدم بتكون زيادة عند المرأة الحامل اللي صحتها كويسة، أكتر من باقي الستات، فالمُخاطرة بالنسبة لمريضة السكر الحامل أكبر بكتير، وكمان نسبة الكلوجوز الزيادة في الدم دي بتعلي نسبة إصابة الجنين بالتشوهات الخلقية.
ولازم نفتكر إن المخاطر اللي بيواجها مرضى السكر من النوع الأول والتاني لازم ناخدها بعين الأعتبار مع الحوامل، وده مع مراقبة زيادة لحالتها، وتظبيط جرعات الأنسولين بإشراف طبي.
الناس اللي عندهم سكر مش محتاجين ياخدوا أي إجراءات وقائية خاصة بالصيام في رمضان
لأ طبعاً، أي حد عنده السكر لازم يجهز نفسه لرمضان من قبل ما يبدأ، وياخد باله بعناية شديده هو هيعمل ايه وهيتعامل مع صحته إزاي. فقدرتك على الصيام بأمان من غير ما يكون في خطر على حياتك بتتوقف على نوع السكر اللي عندك والأدوية اللي بتاخدها.
وخلال فترة الصيام، اللي بتكون مدتها حوالي تمن ساعات، بيبدأ الجسم يستخدم الطاقة اللي متخزنة فيه علشان يخلي معدلات السكر في الدم طبيعية، وبالنسبة لأغلب الناس الموضوع ده مش مؤذي. بس مع مرضى السكر بتظهر مشاكل تانية زي إن نسبة الكلوجوز في الدم بتزيد لما بياكلوا وجبات كبيرة في الفطار أو السحور.
ولازم تكون عارف بردو إن قدرتك على الصيام بأمان من غير أي مضاعفات صحية بيتوقف على نوع الأدوية اللي بتاخدها، ولازم تلجأ لطبيبك وتظبط مواعيد الأدوية معاه وتاخد نصايحه في الصيام من قبل بداية رمضان، وهو أكيد هيرشدك وهيعملك روتين الصيام المناسب ليك.