علشان تتجنب الجفاف وفي نفس الوقت تحافظ على الدايت وحرق الدهون، خصوصًا في رمضان، اللي متعودين فيه على مشروبات بسعرات حرارية عالية وسكريات كتير، من السوبيا والتمر هندي للمشروبات الغازية، هنساعدك بمشروبات مفيدة وبتساعد على حرق الدهون وهتحمي جسمك من الجفاف اللي ممكن تتعرضله بسبب الصيام، لو لسه مصمم تلحق فورمة الصيف في آخر رمضان.
شاي الجنزبيل
غير إنه بيساعد على الاسترخاء، وبيستخدم في حالات طبية زيّ علاج البرد، شاي الجنزبيل بيساعد في تقليل الشهية وحرق الدهون بطريقة فعالة.
عصاير الخضروات والفاكهة
نصيحة تبان معتادة، بإنك تستبدل المشروبات الغازية والعصاير المعلبة بالعصاير الفريش من غير سكر، والعصاير مش بس فاكهة، الخضار كمان له فوايد كتير جدًا بتساعد في الدايت وسعراتها الحرارية قليلة، علشان كده، نوّع في العصاير بين الخضار والفاكهة اللي بتحبهم، كمان العصاير تقدر تخليها مشروبك على الفطار في الجو الحر اللي بنتعرضله دلوقتي، والمشروبات الدافية تخليها في فترة بين الفطار والسحور.
بابونج القرفة
من أكتر المشروبات اللي بتعلي نسبة الحرق في الجسم، خصوصًا حرق الدهون في المناطق اللي بتكون أصعب في حرق الدهون المتراكمة في أجزاء الجسم.
الكركديه
تقريبًا المشروب الوحيد من المشروبات المشهورة لرمضان اللي بيساعد على حرق الدهون وسد الشهية، غير إنه بيظبط مستوى السكر والضغط في الدم.
شرب المياه بكميات
بديهيات صح؟ بس قولنا نفكرك، من كتر ما النصيحة دي بتتقال يمكن بنكون بنستهون بيها، بس شرب المياه بكميات كبيرة، غير إنه بيساعد على ترطيب الجسم وتعويض الجفاف اللي بيتعرضله في فترة الصيام، كمان مهم في الدايت، وبيساعد بنسبة كبيرة جدًا في حرق الدهون.
الشاي الأخضر
ملك مشروبات الدايت، وبديهي إننا نقول عليه، لكن فيه حاجة مهمة جدًا يمكن ناس كتير مش بتاخد بالها منها، وهي إنك لازم تتجنب شرب الشاي الأخضر على الفطار، لإنه هيسبب هبوط وانخفاض في ضغط الدم، علشان كده ماينفعش تشربه على الفطار أو تفاجئ معدتك بيه، اشربه بين الفطار والسحور في أي وقت.