حكاية أغرب من الخيال.. فصل جديد من قضية مغارة “علي بابا” بالزمالك

فصل جديد من القضية المعروفة إعلاميًا ب”شقة الزمالك” أو “مغارة علي بابا” شهدت عليها محكمة جنايات القاهرة اللي قضت بالسجن 5 سنين على مالك شقة الزمالك وزوجته وغرامة مليون جنية بعد إتهامهم بالإتجار في الآثار.

ومن ساعة ما بدأت قصة شقة الزمالك ومحدش كان يتخيل أن مقتنياتها بتمثل كل الإبداع اللي كشفته صورها بعد ما اتنشرت ما بين تابلوهات تاريخية وقطع أثرية وأنتيكات ملكية، وهتفضل الشقة دي حديث ناس كتير بالذات المتخصصين لفترة طويلة.

جانب من مقتنيات شقة الزمالك – عن المصري اليوم

إيه سبب الحكم؟

النيابة العامة كانت أحالت مالك شقة الزمالك وزوجته واتهمتهم بالإتجار في الآثار وبيع وشراء ومبادلة القطع الأثرية بشكل اعتيادي وامتلاكهم ل 1384 قطعة أثرية بترجع لفترات زمنية مختلفة من الحضارة المصرية القديمة والعصور الإسلامية.

في بيان أصدرته النيابة العامة حوالين القضية إن “كل المضبوطات التي لقتها مع المتهمين بتخضع للحماية قانونًا وغير مسجلة بالمجلس الأعلى للآثار وأن المتهمين مأخطروش المجلس بيها عشان تتسجل في المدة المقررة قانونا لده مع أنهم عارفين أنها قطع أثرية.

بعد معاينة شقة الزمالك كشفت السلطات عن وجود قطع أثرية ومستندات مهمة، كمان كشفت لجنة خاصة لفحص الآثار دي عن أثريتها وأنها مش متسجلة وبالتالي المتهمين اتحالوا للجنايات بسبب اعتبارهم واتهامهم بحيازة الآثار بشكل غير قانوني.

جانب من مقتنيات شقة الزمالك – عن المصري اليوم

قصة شقة الكنز في الزمالك

تشديدات أمنية وضباط بلبس رسمي ومدني، ده كان المشهد في يونيو السنة اللي فاتت قدام العمارة اللي فيها شقة الزمالك الموجود جواها الكنز الأثري وهو عبارة عن تحف وآثار ومشغولات ذهبية، العمارة اللي بتضم مقتنيات قيمتها مليارات الجنيهات في نص شارع اسمه “المنصور محمد” بمنطقة الزمالك.

الشقة ملك المستشار أحمد عبدالفتاح حسن اللي بيقيم في دولة الكويت وبيشغل منصب قضائي هناك، عبدالفتاح قال في تصريحات السنة اللي فاتت لجريدة “الأنباء الكويتية” أنه نجل عبدالفتاح باشا حسن وزير الداخلية ووزير الشؤون الاجتماعية في حكومة الوفد سنة 1951 في عهد الملك فاروق، وأشار إن جميع المضبوطات باختلاف أنواعها هي ملك للأسرة اللي ورثتها عن الباشا بشكل شرعي وهو حصل عليها بسبب منصبه أو عن طريق شرائه ليها من مزادات حولين العالم.

عبد الفتاح باشا حسن وزير داخلية مصر في عهد الملك فاروق – عن القاهرة ٢٤

النيابة العامة كانت شكلت 5 لجان متخصصة من وزارة العدل والثقافة والمالية لفحص وفرز المضبوطات وأتبين إن الشقة فيها 400 تحفة فنية وأنتيكات ومشغولات، وقطع أثرية وأحجار كريمة ونادرة وتحف من الذهب الخالص وعدد كبير من اللوحات الأصلية لأشهر الرسامين في العالم، ده بالإضافة لعدد كبير من الأوسمة والنياشين الملكية.

الجانب من مقتنيات شقة الزمالك – المصري اليوم

بداية غريبة لقصة أغرب

قصة شقة الزمالك بدأت بطريقة غريبة لما دخلها واحد من قرايب مالكها ومعاه قوة من الشرطة لتنفيذ حكم قضائي، ولما دخلوا صعقوا حرفيًا من اللي جوا الشقة واللي فيها من محتويات، واتحفظت الأجهزة المختصة على الشقة على طول واتشكلت لجنة لجرد المحتويات وكتابة تقرير ومن هنا بدأت القصة اللي مش عاوزة تخلص.

الجانب من مقتنيات شقة الزمالك – المصري اليوم

أخر كلمة: ماتفوتوش قراءة: شقة الزمالك اللي الشرطة لقيت فيها ألاف القطع الأثرية، مين صاحبها وتفاصيل تانية

تعليقات
Loading...
Tweet
Share
Share
Pin