حالة من الحزن بيعيشها أهل محافظة السليمانية بإقليم كردستان العراق بعد ما اتواصل تفشي حالات الإصابة بالإسهال والقيء بين المواطنين اللي بينهم نسبة كبيرة من الأطفال واللي اتشخصت إنها إصابة بالكوليرا، واحدة من المستشفيات الخاصة بالأطفال أعلنت عن وفاة طفل عنده 4 سنين بعد ما عاني من مضاعفات الإصابة بالإسهال والجفاف والقيء.
خبراء صحيين هناك اعتبروا اللي بيحصل ده علامة خطيرة على أن الموجة الوبائية دي بتختلف في شدتها وحدتها السنة دي عن المعتاد وهي حالات وصفتها تقارير أنها مرتبطة في العادة بتغيرات الطقس وبداية فصل الصيف.
أربع الاف حالة
الجهات الصحية في المحافظة قالت أنه تم تسجيل دخول أكثر من 4 آلاف حالة في أقل من أسبوع واحد بس بمعدل 700 لـ 800 حالة يوميًا وده يحسب كلام المتحدث باسم مديرية صحة السليمانية سامان لطيف لوسائل الإعلام، وكشف لطيف أنهم مستنيين وصول نتائج التحاليل للمرضى اللي بعتوها لمختبرات في العاصمة العراقية بغداد، عشان يتأكدوا اللي بيحصل ده ناتج عن الإصابات بمرض الكوليرا ولا لا.
بداية انتشار للكوليرا
مدير عام مديرية صحة السليمانية صباح هورامي حذر قبل أيام من أن شكوكهم رايحة لتأكيد أن اللي بتشهده المنطقة من ارتفاع مهول في حالات الإسهال هو بداية لانتشار وباء الكوليرا وتفشيه على نطاق واسع.
منظمة الصحة العالمية والكوليرا
منظمة الصحة العالمية في كلامها عن الكوليرا وصفته بأنه مرض شديد إلى أقصى حد أعراضه بتتسبب في الإصابة بإسهال حاد وبيعد لفترة بتتراوح بين 12 ساعة و5 أيام عشان تظهر أعراضه على الشخص بعد ما ياكل أكل ملوث أو يشرب مياه ملوثة.
الكوليرا بتيجي للأطفال والبالغين وممكن تموت في ظرف ساعات لو ماتعالجتش، معظم اللي بيصابوا بيها بيبان عليهم أعراض خفيفة في الأول وبعدين يجيلهم إسهال قوي وجفاف شديد وممكن ده يتسبب في الوفاة لو اتسابوا من غير علاج.
تاريخ الكوليرا
انتشرت الكوليرا في القرن الـ 19 في العالم وكان مصدرها الأصلي هو دلتا نهر الجانج بالهند، وحصل منها 6 موجات من المرض ده توفي فيها الملايين من البشر في كل القارات.
وبعدين حصلت موجة سابعة بجنوب آسيا في سنة 1961 ووصلت إلى أفريقيا في عام 1971 وبعدين للأميركيتين في 1991، وتتوطن الكوليرا دلوقتي في بلاد كتير حوالين العالم بحسب منظمة الصحة العالمية الصحة العالمية.