واحنا في عصر الكورونا وأوميكرون وكل الفيروسات اللطيفة دي، بقى أسخف حاجة ممكن تحصل لنا في الشتا هو دور البرد. لإننا وصلنا لمرحلة من كتر المتحورات المختلفة اللي حولينا وأعراضها اللي شبه بعض. مابقيناش عارفين نفرق بين أي فيروس أو بين البرد العادي. وبتخش في دايرة واسعة من الاحتمالات اللي بتنتهي في النهاية إنه يارب يبقى برد وخلاص.
ولإنها مرحلة بقت سخيفة وعلشان لو جالنا دور البرد مايطولش معانا ومايخدش أكتر من يومين. جمعنالكم حاجات مش المفروض نعملها واحنا عندنا دور البرد لإنها ممكن تطول من فترة حضانة الفيروس في جسمنا.
طب زيّ إيه الحاجات دي؟
- أول حاجة بنعملها وبتطول معانا دور البرد هي النقط اللي بناخدها للأنف لو استخدمناها أكتر من يومين ممكن تعمل مشاكل. ده غير إن كترها على المدى الطويل مش كويس. لإنك بتكون اتعودت عليها وشوية هتبقى عاملة زيّ الإدمان ومش هتعمل معاك أي مفعول.
- تاني حاجة هي لما بتعمل مجهود كبير زيّ إنك تروح الجيم مثلًا وتلعب رياضة. جسمك أصلًا بيبقى طاقته خلصانة بسبب الأدوية اللي بتاخدها ومحتاج راحة خصوصًا لو الأعراض شدت عليك شوية.
- تالت حاجة هي إنك تاخد مضادات حيوية بدون داعي، اكتفي بأدوية البرد بس! أه المضادات الحيوية بتعالج أسرع بس على المدى الطويل بتضعف مناعتك وبتخلي دور البرد ييجي لك كل مرة أصعب من المرة اللي قبلها. وبالتدريج وعلى مدار السنين للأسف جسمك مش هيبقى قابل أي مضاد حيوي.
- رابع حاجة بتعملها إنك تروح لنوعيات من الأكل مش بتبقى محبذة في الفترة دي زيّ البيض والفراولة. أو إنك تشرب مشروبات كحولية أو حاجات فيها مادة الكفايين لإنها بتضعف من الجهاز المناعي.
- خامس حاجة هي إنك تعطس في أي حتة زيّ إنك تعطس على إيدك مثلًا أو ماتستخدمش منديل. ده هيخلي الفيروس في إيدك وينتقل لك تاني بسهولة. أحسن حاجة إنك تستخدم منديل وقت العطس وترميه على طول وماتستخدمهوش تاني.
- سادس حاجة وهي إنك ماتخدش وقت كافي من الراحة والنوم وتهلك نفسك في حاجات مش مهمة وماتشربش حاجات سخنة!
- أخر حاجة بقى البس تقيل واتدفى كويس وخد الفيتامين C علشان الفترة دي تعدي على خير!