لمشاركة الجمهور والوسط الفني وعلشان نملى الدنيا غنا وأجواء لطيفة في وسط وقت صعب، عمرو دياب بيشارك بأغنيته الجديدة “محسود” في تحدي مع الجمهور علشان يغني جزء من الأغنية وينزلها والهضبة بيشوف الفيديوهات على السوشيال ميديا وبينزلها ويعلق عليها، فتعالوا نشوف مين شارك في التحدي.
ومن هنا، ابتدى كل اللي بيحبوا عمرو يشاركوا في التحدي، ونجوم كتير كمان شاركوا، منهم الشاعر تامر حسين ونشر فيديو وهو يغني محسود، وعلق عمرو دياب على الفيديو بعد أن أعاد نشره وقال: “برافو يا تامر”.
وشارك رامي صبري في التحدي وغنى الأغنية بصوته وعلق عمرو دياب على مشاركة رامي صبري في تغريدة على حسابه على موقع تويتر، نشر فيها الأغنية بصوت رامي وعلق: “الله الله الله إيه الحلاوة دي.. المنافسة بقت شديدة أوي أحسنت”.
وشارك الفنان رامي جمال في التحدي كمان، ورد عليه الهضبة: “الله الله براڤو يارامي أحسنت”.
وشارك المطرب محمد محسن في تحدي محسود وغنى الأغنية بصوته بدون مزيكا ورد عليه عمرو دياب: “الله يا محسن أحسنت”.
وبشكل مختلف، نسمة عبد العزيز شاركت في التحدي للأغنية بس بالعزف الخاص بيها.
ومحمد الشرنوبي شارك في التحدي ورد عليه عمرو دياب: “الله”
وكمان كارمن سليمان شاركت في التحدي، وعلق على الفيديو بتاعها الهضبة وقال “الله الله الله إيه الحلاوة دي يا كارمن”.
أغنية “محسود” من كلمات الشاعر تركي آل الشيخ، وألحان خالد عز، وتوزيع عادل حقي، ويغنيها الهضبة ضمن ألبوم “يا أنا يا لأ”، اللي هينزل خلال الأيام الجاية.