في حفل تكريم الفنان محمد صبحي باليوبيل الذهبي لإنشاء فرقته المسرحية “استديو الممثل” بعد مرور 50 سنة بداية أول عروضها سنة 1969، الفنان محمد صبحي قام بتوزيع جوائز على فنانين وفنانات شاركوه مسيرته الفنية واشتغلوا معاه على مدار السنين، وكان تمثال جوائز الحفلة على شكل محمد صبحي في شخصية هاملت من مسرحية هاملت اللي ساهم كتير أوي فيها علشان تنجح، وحضر الحفلة فنانين كتير جدًا زيّ نبيلة عبيد، وسوسن بدر، ولبلبة، وداليا مصطفى، ومها أبو عوف، ومشاهير تانية كتير.
ولكن في ناس كتير من الجمهور على السوشيال ميديا هاجموه بسبب شكل تمثال الجائزة، واتهموه بالنرجسية، ورد الفنان محمد صبحي إنه مش مهتم بالهجوم ده وإنه بيكرم الفنانين مش بيكرم نفسه، وفنانين كتير دافعوا عنه إنه واحد من الناس اللي ساهمت بشكل كبير في عالم الفن في مصر من خلال أعماله وأدواره الفنية الراقية.
وقال المذيع شريف نور الدين مدافعًا عنه إن الهجوم اللي عليه مش مبرر وإن التمثال على شكله في شخصية هو أداها وكانت أول عمل ناجح كبير ليه فحب يكرم زملائه برمز ناجح علشان يبين إنه ممتن ليهم لإنهم شاركوه المسيرة الناجحة وإنه ماكنش يقدر يوصل للنجاح ده من غيرهم.
