كلام كليشيه بوصفات خزعبلية؟ هنبعد عن كل ده، بس لازم نعرف فوائد لحاجات كتير طبيعية موجودة حولينا، ممكن تكون حل لمشاكل بنقابلها لصحتنا، خصوصًا للناس اللي بتحب تلجأ لحلول طبيعية وبتبعد عن الحاجات المصنعة كيميائيًا، هنعرف عن فوائد زيت شجرة الشاي وازاي نستفيد منه لصحتنا وجمالنا. لإنه معروف بتأثير مضاد للبكتيريا وقاتل للفطريات، وبيدعم شفاء الجروح بشكل أحسن وأسرع.
علاج الحبوب
يمكن ده أشهر استخدام لزيت شجرة الشاي، اللي له تأثير كبير في علاج الحبوب اللي بتزعج بشرتنا، وبيدخل في تصنيع منتجات كتير لعلاجها زيّ الصابون المخصص لده، أو غسول البشرة، لكن لو حابين تستخدموه بطريقة طبيعية أكتر، ممكن تعملوا وصفة بسيطة، بـ 3 كوبايات مياه يتضاف عليهم 30 قطرة من زيت شجرة الشاي.
تطهير الجروح
لإنه فعّال في تحفيز خلايا الدم البيضا اللي بتعجل بشفاء والتئام الجروح، بيتم استخدامه لتطهير الجروح وتنظيفها لإنه كمان مضاد للبكتيريا.
غسول الفم
لإنه بيساعد على التخلص من الفطريات والالتهابات اللي بتصيب اللثة، بيتم استخدامه كغسول للفم خصوصًا بعد علاج الأسنان أو اللجوء لعمليات جراحية في الفم.
تعقيم اليدين
علشان يعتبر من الزيوت المهمة كمطهر مثالي للإيدين، وأثبتت دراسات إنه بيساعد على قتل البكتيريا والجراثيم والفيروسات المسئولة عن نزلات البرد، وممكن كمان تضيف قطرات من زيت شجرة الشاي لمعقم الإيدين الخاص بيك.
علاج قشرة الشعر
سواء بحمام الزيت، أو إضافته على الشامبو، الزيت ده بيساعد على تقليل ظهور قشرة الشعر، ممكن نضيف قطرات من الزيت على مياه ونحطها على فروة الرأس لدقائق وبعدين نغسل الشعر، أو نضيف بعض القطرات للشامبو.