بعد ما اتباركوا بمياه المجاري: أشهر خرافات لسه معششة في دماغنا

واحنا بنقلب في الأخبار علشان نجيب ليكوا حاجة عليها القيمة، لقينا فيديو منتشر لأهالي مدينة إدكو بالبحيرة وهما بيرجعونا 100 سنة لورا بمكوك فضائي. بيستخدموا مياه الصرف الصحي من بلاعة مساجد هناك علشان بيتباركوا بها وبيقولوا إنها بتشفي من الأمراض الجلدية لأ وبيتزاحموا عليها كمان.

الدنيا اتقلبت عليهم والإعلاميين ومنهم عمر أديب اللي قال “هي “بالوعة” إدكو ممكن تفيد المنتخب في حاجة؟” وفي الحقيقة الموضوع ده رجع فكرنا من تاني بشوية أساطير معششة في دماغنا ومش عارفين بدأت منين ولا إزاي وإمتى هنخلص منها.

المقص المفتوح والشبشب المقلوب

كتير من الخرافات المرتبطة بالمقص المفتوح والشبشب المقلوب، يعني عندك مثلًا لو سبت المقص مفتوح كده أنت بتفتح على نفسك مشاكل وحوارات أنت مش قدها، أما بقى لو فضلت تلعب به كإنك ماسك كماشة فجهز نفسك بقى للكوارث اللي هتحصل في المكان اللي عملت فيه كده، أو أهرب. وفي ناس تانية وصل بها الموضوع إنها ترعب الأطفال وتقول لهم إنك لما تقص بالمقص أجنحة الملاك هتتقص وتفضل الأطفال دي عايشة بعقدة الذنب حتى لما تكبر، بنعمل في بعض كده ليه يا جماعة؟

وكله كوم والشبشب المقلوب كوم، خناقة مابتعرفش جاية لك منين بتبتدي مع ست الكل لو سبت الشبشب مقلوب في حته، هو أنت غاوي تنكد علينا يابني؟ إحنا ناقصين؟ ماشية في كل حتة تعدل وراك الشباشب كإنها بتلم قنابل مفخخة.

ماتستحماش بليل

في ناس كتير بتعتبر الحمام أصلًا بيت الشياطين والجن والعفاريت، فما بالك بقى لو استحميت فيه بليل؟ ماتسحموش بليل فيه علشان المياه السخنة ماتحرقش أولاد الجن ويطلعوا عليكوا في الأخر، ولا حتى تعيطوا فيه علشان الجن مايلبسكوش أوتتسخطوا. أقولك على حاجة الحمام مقفول من 9 بليل لـ9 الصبح.

القطة السودا


ن،عن: العربية

كائن بريء وكيوت أخره يخربش وينونو بصوت عالي، بهدلناه ومسحنا بكرامته الأرض وقلينا منه، ناس بتفتكر إن القطط في أصلها عفاريت وإن الجن لابسها وبالتالي في ناس لما بتشوفها بتعاملها بقسوة وبيخافوا حتى يبصوا لها فترة طويلة على أساس إنها هتسخطهم مثلًا، بس في ناس بتقول إن الموضوع له أصل تاريخي وإن ده كان نتيجة عبادة الآلهة القطط زمان.. بس اياً كان الموضوع اتقلب عليهم في الأخر واتاخدوا في الرجلين.

رش الملح

رش المياه عداوة ورش الملح هيحارب الأذى والجن والعفريت، لو جيرانكم عملوا فيكم عمل قدام عتبة الشقة، ماتقلقيش حلها الوحيد رشة الملح، رش في كل الأركان وتحت السراير وفي الأفراح والسبوع وعلى الناس اللي شاكين فيهم عادي علشان يبعدوا عنكم.

الغريب بقى إن الملح كان معروف زمان بعكس كده خالص، من كتر ما كان غالي زمان الناس كانت بتتشائم لما بيقع على الأرض وطلعوا عليه سمعة وحشة. طب هو مين بيودي على فين يا جماعة ماتفهمونا!

عيني بترف

الناس فاكرة لو العين الشمال رفت يبقى أنت كده في خطر أو حاجة وحشة هتحصل لك، طب ماحدش قالك قبل كده إنه ممكن يكون بسبب قلة النوم مثلًا؟ أو نظرك يكون ضعف محتاج تكشف عند الدكتور؟ والغريبة بقى إن الخطر كله بيبقى من العين الشمال، لكن لو العين اليمين أنت كده في الأمان عادي.

أخر كلمة:ماتفوتوش قراءة: دليلك للإنقاذ: كيفية الهروب من مناقشة عميقة.

تعليقات
Loading...
Tweet
Share
Share
Pin