بعد قضية أم سيف: طرق ورموز لازم نعرفها للتعبير عن التعرض للعنف الأسري

انتشر من فترة فيديو لإنفلونسر سورية قاعدة في تركيا وهي بتقول إنها هتتوقف عن عمل فيديوهات، وشوفناها في آخر الفيديو وهي بتعمل رمز بإيديها، واللي معروف إنه بُيستخدم عالميًا لما تكون أي بنت أو سيدة بتتعرض للعنف الأسري وبتحاول طلب المساعدة بطريقة آمنة.. وبعد ما الناس والصحف تداولت أخبار كتير عن الفيديو، وكلها بتتضارب مع بعضها.. ففي اللي قال إنها كانت بتختلق القصة دي علشان بتدور عن الشهرة وفي اللي قال إن إحنا ماينفعش نكدبها لإنها ممكن تكون مهددة وبالتالي مش عارفة تتكلم أو تعبر عن حقيقة اللي حصل. ولكن في النهاية إحنا بنتمنى إنها تكون بخير وأمان.. واللي إحنا حابين نتكلم عنه هنا، هو أهمية نشر الوعي عن طرق ورموز التعبير عن العنف، اللي كتير ماكنش يعرفها قبل انتشار فيديو أم سيف.

القعدة كتير في البيت ممكن تتسبب في الإساءة أو التعنيف من بعض الأزواج أو الأباء، وبعد انتشار فيروس كورونا وكله عمل حجر منزلي وكمان انتشار التوتر والخوف بين كتير من الناس، بقى في خطر أكبر على البنات والستات لإن ده ممكن يرفع نسبة تعرض البعض للعنف الأسري.. وبالمناسبة العنف الأسري مش المقصود بيع العنف الجسدي بس، ولكن ممكن يكون لفظي كمان. ولإنها بقت ضرورة قصوى إننا ننشر الوعي عن الرموز والعلامات اللي نقدر نحدد من خلالها إذا كان في حد في دايرة معارفنا بيتعرضوا للتعنيف والإساءة ولا لأ، حبينا نتكلم عن الموضوع بكل تفاصيله، ونكلمكم كمان عن أهم العلامات وأرقام الإغاثة.

اقرا كمان: المعالج النفسي واللايف كوتش: إيه الفرق بينهم وإزاي أعرف أنا محتاج لمين فيهم؟

تعريف العنف الأسري والمنزلي

في بعض الأوقات ممكن يكون في ناس حوالينا بنشوفهم أو حتى إحنا شخصيًا بنتعرض للإساءة والتعنيف، بس مش بنبقى عارفين ده، لإن للأسف مفهومنا عن العنف الأسري مقتصر بس على “التعرض للضرب”، لكن الموضوع أعمق من كده وبيشمل حاجات كتير منها العنف اللفظي والجنسي.. ودي بعض العلامات اللي تقولك إذا انت أو غيرك في علاقة مسيئة:-

  • إنه يكون بيسبك وبيهينك لفظيًا.
  • بيمنعك من إنك تروح الشغل أو إنك تتعلم.
  • يهددك دايمًا سواء بالكلام أو بالضرب أو حتى السلاح.
  • بيتحكم في فلوسك وبياخدها منك بالإكراه.
  • بيجبرك على العلاقة الزوجية من غير موافقتك.
  • بيرمي حاجات دايمًا عليك.
  • بيضربك ويقنعك بعدها إنك تستاهل التعنيف.
  • بيمنعك من إنك تشوف أهلك وصحابك.
  • بيمنعك من إنك تروح لمنظمات صحية أو دكاترة نفسيين.

علامات إن حد تعرفوا بيتعرض للعنف في البيت

  • بتقدم أعذار دايمًا علشان في كدمات في جسمها.
  • بتعتذر عن إنها تحضر مناسبات مهمة من غير أسباب واضحة.
  • بتقلق دايمًا لما بتقول لجوزها كل شوية عن مكانها وبترتبك لما بيتكلموا في التليفون.
  • مايكنش معاها فلوس معاها دايمًا رغم إن مستواها المادي كويس.
  • بتلبس لبس مش مناسب مع الجو، زيّ لبسها لكمام طويلة أو شال في الصيف علشان تحاول تغطي الكدمات.

رموز وأرقام مهمة للاستغاثة

الرمز المشروح في الصورة واللي عملتها أم سيف في الفيديو، هي الطريقة اللي تقدر أي بنت إنها تستخدمها وهي بتصور فيديو علشان تستنجد بالناس من غير ما تثير الشكوك أو تعرض نفسها للخطر. أما لو مش عايزه تعملي فيديو وتنشريه، فتقدري تبلغي المركز القومي للمرأة عن طريق منصة شكوتك، اللي بتقدري من خلالها تقدمي بلاغ وإرسال الشكاوي عن طريق الإيميل لـ shakwtek@smoinfo.gov.eg أو برسالة واتساب على رقم (01555558756). وتقدري كمان تتوجهي لوحدة المرأة الآمنة اللي موجودة في عدد من المستشفيات، منهم مستشفى القصر العيني ومستشفى المنصورة، والوحدة مخصصة لاستقبال وتقديم الدعم الطبي والنفسي والخدمات للسيدات اللي اتعرضت للعنف سواء جسدي أو نفسي.

طرق دعم السيدات المعرضة للعنف

عن: WHO

وفقًا لوزارة الصحة العالمية، فطرق تقديم المساعدة لو لجألك شخص بيتعرض للتعنيف الأسري، هو إنك تسمعهم باهتمام لما يتكلموا عن المشكلة، من غير ما نديلهم شعور إن إحنا بنحكم عليهم أو بنكدبهم.. وضروري كمان إن إحنا نسألهم عن إزاي نقدر نساعدهم وإن إحنا نطمنهم إن إحنا جاهزين نقدملهم أي نوع من أنواع الدعم.. ولو الموضوع كان كبير فلازم نرشدهم للمؤسسات والأرقام المرتبطة بالتبليغ عن العنف الأسري، علشان يلجأوا لمساعدتهم وحمايتهم بطرق قانونية.

آخر كلمة: نشر الوعى عن علامات العنف الأسري هيساعدنا إننا ندعم كل من يتعرض للتعنيف بكل الطرق اللي في إيدينا!

تعليقات
Loading...
Tweet
Share
Share
Pin