لو مضطرة تسافري أو تكوني في رحلة لوقت كبير في طرق متعرفيهاش مع سائق غريب أو عن طريق أي أبلكيشن من المشهورين دلوقتي، بنقدملك شوية نصايح هتساعدك تحافظي على نفسك ضد أي خطر ممكن تواجهيه من السائق أو الركاب.
أول حاجة لما تركبي اتأكدي أن الباب متقفلش بخاصية “child lock”، ولو اتعرضتي لأي خطر و مقدرتيش تفتحي الباب من جوا العربية حاولي تخرجي إيدك من الشباك و تفتحي الباب من برا.
كمان لما تركبي، يستحسن تتجنبي الجلوس في منتصف الكنبة على عكس ما أغلبنا بيفتكر إن كدة هنكون متابعين السائق بشكل أكبر، لكن في الحالة دي هتكوني في موقع أسهل للسيطرة بالنسبة ليه، ويستحسن تكوني ورا السائق علشان تكوني بعيدة عن قدرة التحكم والسيطرة بتوع مقعد السائق.
ماتنسيش تبعتي بيانات السائق والعربية وبيانات الرحلة لحد من أفراد أسرتك أو أصحابك المقربين، ويقدر الشخص ده يتابع معاكي رحلتك وإنتي في الطريق كمان إذا أمكن.
ولو لابسة سكارف حاولي إنها متكونش ملفوفة بإحكام حوالين رقبتك علشان ميقدرش يستخدمها في السيطرة عليكي وخنقك، وخليها علي أكتافك بحيث تقدري في أي موقف تستخدميها في الدفاع عن نفسك.
لازم يكون في شنطتك سبراي تقدري تدافعي بيه عن نفسك، ولو أضطريتي تستخدميه، رشيه في وجه الشخص مباشرًة، وبعددها تحاولي تهربي وقت ما هو منشغل بإصابة عينيه. وكمان حاولي دايمًا يكون في شنطتك أداة تقدري تهاجمي بيها السائق عن طريق الضرب علي إيديه لو تجاهل مطالبتك بوقف العربية فورا، وبالطريقة دي هيضطر يوقف العربية كرد فعل سريع للضربة اللي هيتلقاها في إيده، لكن خلي بالك بردو متكونش أداة مؤذية ليكي إنتي أثناء حملها في شنطتك. لو مش معاكي أي أداة ممكن تستعملي موبايلك، بطريقة بسيطة هتمسكي الموبايل كويس و توجهي الطرف الحاد منه عند أي زاوية من الموبايل للسائق.
حاجة كمان مهمة جدًا، إنتي لازم تاخدي بالك من وضع شنطة إيدك بالقرب منك بحيث ميقدرش السائق يستخدمها ضدك في الضرب، وعلشان كمان تقدري تستخديمها إنتي في المواجهة، وللسبب ده إحرصي إنها تكون دايمًا تحت سيطرتك.