انتشار الفيروس المخلوي التنفسي في المدارس: أعراضه وعلاجه وطرق الوقاية منه

مع بداية دخول فصل الشتاء ومع نزول التلاميذ للمدارس الصبح بدري في عز البرد، بدأ ينتشر فيروس المخلوي التنفسي “RSV” بين الأطفال في المدارس بشكل كبير، وده اللي خلى وزارة الصحة تبدأ توجه مجموعة من التحذيرات بخصوص انتشار الفيروسات التنفسية في الفترات اللي بتيجي بين الفصول.

إيه هو الفيروس المخلوي التنفسي؟

الفيروس المخلوي التنفسي، عن: almasryalyoum

هو فيروس تنفسي بيدخل الجسم عن طريق العينين أو الأنف أو الفم، ولإنه بينتشر عن طريق الهوا، فممكن تتم الإصابة لو كان في حد بيكح أو بيعطس جنبك وكان مصاب بالفيروس، وممكن تتم الإصابة عن طريق التلامس زيّ السلام بالأيد، وممكن الفيروس يعيش لساعات طويلة على المواد الصلبة زيّ الخشب والمعادن والألعاب.

الفيروس مش خطير ولكن بيسبب التهاب الرئتين والجهاز التنفسي، وبيظهر أعراض تشبه نزلات البرد العادية، وفي أغلب الحالات مش بنحتاج أكتر من علاجات البرد البسيطة، أغلب الإصابات بالفيروس بتكون بين الأطفال قبل ما يكملوا السنتين، ولكن ممكن البالغين يصابوا به كمان.

إيه هي أعراض الفيروس؟

وضح الدكتور “حسام عبد الغفار” المتحدث باسم وزارة الصحة والسكان، إن إنتشار الفيروس في الوقت ده من السنة حاجة عادية، وأكد إن مافيش أي داعي للقلق.

وقال عبد الغفار في تصريحات خاصة لـ “بوابة الأهرام”، إن أهم أعراض الفيروس الخلوي التنفسي عند الأطفال هي سيلان الأنف، الكحة، ارتفاع درجة الحرارة (السخونية)، سدة النفس (فقدان الشهية)، العطس، الصفير. 

ازاي نحمي أولادنا من أمراض البرد؟

تلاميذ مصريين في المدرسة، عن: 24.ae

 أكد الدكتور “تاج الدين” في مكالمة تليفونية مع برنامج “صباح الخير يا مصر” على القناة الأولى الفضائية، إن سبب انتشار الفيروس الأيام دي هو خروج التلاميذ للمدارس والحضانات.

بيوضح “تاج الدين” إن الخروج من جو البيت الدافي لجو الشارع البارد والرطب في الصباح البكر في وجود تيارات هوا بيزود احتمالية الإصابة بالعدوى، أكد كمان إن قفل شبابيك الفصول في أيام البرد بيسبب انتشار الفيروس بسبب انتقاله بالتنفس والاحتكاك المباشر.

أما مستشار رئيس الجمهورية، فناشد الآباء والأمهات بعزل أي طفل مصاب ببرد أو زكام عن أخواته وزملائه في المدارس، علشان ما ينقلش العدوى وعلشان مايصابش بمضاعفات، وأكد على أهمية تعليم الطفل النظافة الشخصية وغسل الأيدي بعد العطس، والعطس والرشح في منديل ورمية في الزبالة.

طرق العلاج والوقاية من الفيروس التنفسي المخلوي

بيوضح موقع مراكز السيطرة على الأمراض والوقاية منها الأمريكي “CDC“، إن أهم الخطوات اللي ممكن تساعدنا في التخفيف من الإصابة بالفيروس التنفسي المخلوي، هي استخدام مخفضات درجة الحرارة والمسكنات اللي مش محتاجة روشتة، زي “الأسيتامينوفين أو الإيبوبروفين” علشان نقلل من حدة السخونية والألم.

لازم نتأكد إننا مانديش الأطفال أسبرين خالص لإنه خطر عليهم، ولازم عمومًا قبل ما ندي الأطفال أي دوا نكلم دكتور متخصص، لإن الأطفال حساسين جدًا للأدوية. أما الخطوة التانية في العلاج هي إننا نزود شرب السوائل علشان نمنع الجفاف.

أما الخطوات اللي ممكن تساعدنا نتجنب حدوث الإصابة بالعدوى هي؛ غسل الإيدين، وتغطية الفم والأنف لما نكح أو نعطس، ونقلل التواصل مع الناس اللي عندها سخونية أو دور برد.

وممكن كمان نتأكد من أسطح الحمامات والمطابخ وأوكر البيبان نضيفة، ونرمي المناديل المستخدمة في الزبالة على طول، وماندخنش علشان الأطفال اللي بيتعرضوا للدخان بيكونوا معرضين للإصابة بالعدوى أكتر.

آخر كلمة: ماتفوتوش قراءة: تصريحات وزير الري بخصوص سد النهضة ومخزون مصر المائي

تعليقات
Loading...
Tweet
Share
Share
Pin