بواسطة منة حسني.
مين قال إن اليوجا راجل بعيون ضيقة ورجلين مربعة وساند إيده عليهم؟ أو مين قال إن اليوجا بتاعت الرفيعين بس أو اللي عندهم مرونة بس ومين قال إنه في شروط لممارسيها اصلًا؟ خلينا نتعرف علي حقيقة ثقافة زيّ اليوجا مع بعض..
بدايتها
اليوجا بتعتبر ثقافة هندية قديمة و”واحدة من مدارس الفلسفة الهندية”. طب يعني إيه اصلًا مدرسة فلسفة؟
يعني نظرة للحياة وأسلوب وفكر ومعتقدات مختلفة عند الهنود القدامي عن جميع جوانب الحياة، واليوجا بتعتبر واحدة منهم. فنقدر نستنتج من هنا إن اليوجا كانت واحدة من أساليب الحياة عند الهنود القدامي؛ يعني بتعتبر ثقافة كاملة مش بس مجرد رياضة، ودلوقتي بيستخدمها العالم كرياضة ذكية لتنشيط الجانب البدني والعقلي والنفسي.. بعيدًا عن أي اختلافات ايديولوجية.
ممارستها كرياضة
وممارسة اليوجا كرياضة بيشمل جوانب مختلفة من الممارسة.. وده بيشمل التمرينات البدنية وأجزاء خاصة بالتأمل والاسترخاء -وفي فرق كبير بين التأمل والاسترخاء هنتكلم عنه في الاجزاء اللي جاية- ومنهم الجزء الخاص تمارين التنفس وأنواعه.
أساسها قديمًا
لكن أساسها مكانش مرتكز علي التمارين البدنية.. أساس اليوجا و فلسفتها كانوا معتمدين علي فكرة ضبط النفس والمشاعر ومساعدة العقل على الانضباط والنمو الروحي والتوسع العقلي عن طريق التأمل والتركيز العقلي وعمليات التنفس العميقة. والأسس دي مكتوب عنها في كتيب عمره أكتر من 2000 سنة وبيتكلم عن فلسفة اليوجا إسمه “يوجا سوترا”، وده دليل علي أقدمية اليوجا وعلى أهميتها كثقافة كاملة عمرها أكتر من 2000 سنه ومش بس مجرد رياضة بدنية..
التطور العصري
تم الاهتمام واضافة التمرينات البدنية لليوجا، فالهند وتليها أوروبا في أواخر القرن التاسع عشر.. وتوسع ممارستها والاعتراف بيها كرياضة تصح الجسم وتعالج مشكلات مختلفة من مشاكل العضلات والمفاصل والأرق وقلة التركيز ومشاكل الجهاز التنفسي وأكتر..
كلنا نقدر نمارسها
ومع تعدد أوضاع اليوجا وأنواعها ومدارسها وتدرج أوضاعها بين أوضاع سهلة للمبتدئين و أوضاع متقدمة في الصعوبة و بساطة أدواتها، بتتاح ممارستها بسهولة في أي وقت ومكان و تتاح لأي شخص ممارستها مهما اختلف عمره ووزنه وحالته الصحية.. أهم حاجة هي استشارة الطبيب قبل الممارسة لو كان في أي مشكلة صحيه وطلب مساعدة معلمين اليوجا وترشيحهم للاوضاع المناسبة لجسمك و لنسبة مرونته وحالته الصحية.
تابعونا هنتكلم بشكل أكبر عن فوايد اليوجا النفسية والبدنة والعقلية.. وعن خطوات البدأ في ممارستها.. استنوا الجزء التاني الأسبوع اللي جاي..