دايمًا بنسمع عن فوايد اليوجا للمساعدة في صفاء العقل والاسترخاء وسلامة الجسم، خصوصاً في أوقات التوتر والأزمات زي اللي بنمر بيها دلوقتي، بس بمجرد ما بنفتح فيديو لليوجا ونحاول نمارسها بنلاقي أوضاع كتيرة ومصطلحات مش مفهومة، وده بيحسسنا إنها رياضة صعبة أو شبه مستحيلة من قبل حتى ما نبدأ نجربها.
فرح مراد بتقدم الحل للمشكلة دي عن طريق قناتها على اليوتيوب “Anupama Yoga With Farah” اللي بتقدم فيها مجموعة من الفيديوهات التعليمية وتمارين اليوجا بالعربي علشان تشرح وضعيات اليوجا وأساسياتها بالتفصيل وبطريقة سهلة علينا كلنا.
اليوجا هي واحدة من أجمل وأهم الرياضات لجسم وعقل الإنسان مهما كانت حالته الصحية، وهي رياضة بسيطة مش بتتطلب أي معدات وممكن ممارستها في أي زمان وأي مكان.
وعلشان كده، فرح بتمارس تمارين مختلفة في كل فيديو، وبتقول معلومات جديدة عن أهمية وفوايد التمارين اللي بتعملها للعقل والجسم، زي إن اليوجا بتساعد على تخفيف آلام العضلات اللي بتنتج عن الشد العضلي، وبتساعد في عملية طرد السموم من الجسم وبالتالي بتزود من النشاط اليومي والحالة الصحية، وكمان بتشد الجسم وبتمنع الترهلات اللي بتزعج ناس كتيرة في حياتهم، ده غير إنها بتحسن من كفاءة عملية التنفس وبتساعد على صفاء الذهن والتركيز.
ومن أكتر الحاجات المميزة في فيديوهات فرح، هي إنها بسيطة ومناسبة لكل الأشخاص وكل الأوقات لدرجة إنها عملت فيديو فيه تمرينات لكل اللي عندهم شعور بالكسل ومش قادرين يقوموا من السرير، فإديتهم جلسة يوجا تساعدهم على الاسترخاء وتغير من حالتهم المزاجية من غير ما يتحركوا من مكانهم.
كل الفيديوهات والتمارين بتنتجها فرح بنفسها، وهي بتحاول تفيد أكبر عدد ممكن من الناس، وتخلي رياضة اليوجا متاحة لكل الفئات والأعمار من أول الأطفال لكبار السن علشان تغير المفهوم الخاطئ عن اليوجا بإنها بتحتاج أعمار ومهارات جسدية معينة لممارستها والاستفادة منها.