بقالنا سنين بنشوف ظاهرة متكررة وهي موضة إعلانات رمضان، وبقت تاخد حقها في السف والتريندات زيها زي المسلسلات والبرامج بالظبط، ومع بداية ماراثون إعلانات السنة دي.. قررنا نحللها ونقسمها ونشوفها على طريقتنا، فتعالوا نشوف لاحظنا إيه والخلاصة كانت إيه.
حب خلي الناس تحب روح للناس ياحب
في قنبلة حب وقلوب كتير انفجرت مع بداية عرض الإعلانات على القنوات ساعة الفطار، لسه الراجل ماخلصش جملة “صومًا مقبولًا وإفطارًا شهيًا” ولقينا قصص الحب هلت علينا من إعلان بيحكي قصص حب مختلفة بأجيال مختلفة وأحداث كتيرة تحس إنك دخلت فيلم رومانسي ببلاش على صوت إليسا، ونقلب القناة التانية نلاقي صوت عمرو دياب بيحكي عن قصص الحب اللي من أول نظرة وذكريات الطفولة والمدرسة، فالظاهر إنهم مالحقوش يخلصوا الإعلانات دي في عيد الحب فقرروا ينزلوا بيها في رمضان.
أسمراني وعيونه سمرا
أغنية من أورانج بتحكي حكاية البلد وجدعتنها والمخرج وهو بيلففك في كل شوارع ومدن مصر، تمام مقولناش حاجة، بس إيه علاقة أسمراني وعيونه سمرا بإن أحمد عز يظهر؟ هو كاريزما وكل حاجة بس كان يليق أكتر على إعلان بـفيلا سعرها جنبه 7 أصفار، بس لو الإعلان كان مزنوق في حد يمشي مع تيمة الجدعنة، أحمد السقا قصر معانا في إيه؟
الحاجة التانية اللي لاحظناها في أنهم ماضيين عقد احتكار مع حسين الجسمي للسنة الخامسة على التوالي، واللي خلانا نتأكد إنه فعلًا بيحقق شعار الشركة بـ”دايمًا مع بعض”.
جورجينا VS أم خالد
واحنا في رحلتنا مع اكتشاف الإعلانات لقينا إعلان لأم خالد عن مشروب قهوة، مهداه لحبايب قلب أم خالد في مثال للست المصرية الأصيلة بخفة دمها، وقلبنا على القناة الثانية لقينا إعلان كومباوند لجورجينا في مشاهد من أولها لأخرها إنجليزي وفي الآخر بتحاول تنطق عربي وهي بتقول “سعادة”.
كورس تنمية بشرية
للسنة الخامسة على التوالي إعلان بنك مصر قدر يرسخ الفكرة إننا لازم نكمل “أنا ابن مصر” و”يا معافر كمل للآخر” والسنة دي “عاش يا بطل” لدرجة إننا لو قفلنا صوت الإعلان واكتفينا بفرجة على حركة المشاهد هنعرف بيقدم إيه، ولسه مصممين يخلونا نعافر ونقوم بس المختلف إن أحمد سعد أخد الراية من العسيلي.
روبي ودينا رجعوا لبعض
في السنة الأولى ظهرت روبي ودينا مع بعض في إعلان إحنا فريش وفرافيش والسنة اللي فاتت عملته روبي لوحدها وشعارها كان “استنى استنى ده أنت هتتهنى هتتهنى”، بس السنة دي بقى رجعوا لبعض وغيروا الشعار من فريش وفرافيش وحصل تطور “لإش أش.. واحنا اللي فرفشنا اللي ماتفرففش”
محمد رمضان بيعوض
الناس كانت مفتقدة جعفر العمدة وحاسه بفراغ من غيره، فقرر محمد رمضان يعوض غيابه بإعلانات في رمضان مع نجيب ساويرس وأنغام واستعانوا بأولادهم ومش عارفين لسه الشهر مخبي لنا إيه مع رمضان.
من البقاء للأقوى للبقاء للأذكى
فاكرين تريند ياسيمن صبري وقت كورونا لما اتسألت عنه وقالت ” اللي ياخده ياخده واللي يكمل يكمل.. والبقاء للأقوى”؟ السنة دي بتكمل أقوالها المأثورة في إعلان ختمت بيه بجملة “البقاء للأذكى”، الإعلان اتحرم من وجود الأغاني بس ماتحرمش من مشهد تمثيلي لياسمين صبري.
قولوا لنا بقى إيه أكثر إعلان عجبكوا وأكثر إعلان عايزين تقولوا له .. كفاية لحد كده.