القبض على هاكر كفر الشيخ المتخصص في فبركة صور وفيديوهات وابتزاز الستات

واحد من أخطر الهاكرز في مصر تم القبض عليه الأيام اللي فاتت، على حسب تقارير مختلفة من صحف مصرية، في القضية المعروفة إعلاميًا بقضية هاكر كفر الشيخ. والهاكر اللي تم القبض عليه متخصص في فبركة صور وفيديوهات إباحية وابتزاز الستات بها. وتم القبض عليه بعد فشل محاولات كتير سبقت المحاولة الأخيرة.

قدرت الشرطة المصرية تقبض عليه من خلال تنظيم أكتر من كمين في الأماكن اللي بيتردد عليها، ويرجع الفضل في القبض عليه لواحدة من الضحايا اللي كان بيبتزهم.

والضحية اللي ساعدت الشرطة في القبض على هاكر كفر الشيخ هي بنت في العشرينات كانت متجوزة من تلات شهور، لما المجرم ده حول حياتها لجحيم. الهاكر فبرك فيديوهات جنسية وصور عارية واستخدمها علشان يهددها بفضيحة ما بين أهلها ومعارفها، وطلب المبتز منها مبالغ مالية علشان مايسربش الفيديوهات والصور.

وقالت الضحية إن المبتز قدر يوصل لملفات الصور والفيديوهات الخاصة بها على تليفونها من خلال إرسال رسالة على الواتس أب فيها لينك بمجرد ما ضغطت عليه قدر المبتز يوصل لكل الملفات اللي على تليفونها. وبعد ما وصل للملفات اللي على تليفونها استخدم صورها وصور أصدقائها في فبركة صور عارية وفيديو إباحي ركب فيه وشها.

بعت المبتز الصور العارية اللي فبركها للبنت على الواتس أب وفي أخر الرسالة فيديو إباحي مدته 22 ثانية بوش البنت وجسم واحدة تانية، ولما شافت البنت الصور والفيديو ده اتخضت جدًا وماعرفتش تعمل إيه، بالذات إن المبتز طلب منها 12 ألف جنية علشان مايسربش الصور والفيديو.

ولكن رغم خوفها وقلقها قدرت البنت الشجاعة توصل اللي حصل لجوزها وتحكيله عن كل اللي حصل، وخلته شاف كل الرسايل اللي بينها وبين المبتز. بعد ما الزوج شاف اللي حصل شجع مراته إنها تبلغ عن المبتز، وده اللي حصل بالفعل. عملت البنت محضر وبالاتفاق ما بين الضحية والجهات الأمنية بدأت رحلة مطاردة المجرم.

واستدرجت الشرطة المبتز من خلال تواصل الزوج مع المجرم وقاله إنه موافق يدي له المبلغ اللي طلبه، وبعد الاتفاق حددوا معاد المقابلة على الطريق الدولي الساحلي في مركز البرلس.

وراح الزوج مكان المقابلة فعلًا بس اتفاجأ بوجود شخص تاني غير المبتز، شاب عنده 20 سنة، وهو صاحب المبتز، وقال للزوج إنه جاي مكان المبتز ياخد المبلغ، في اللحظة دي قدر ظباط الشرطة يقبضوا على صديق المبتز، واللي قادهم لمكان المجرم، وأخدت الشرطة المبتزين على قسم شرطة البرلس.

وبعد حبسهم على ذمة القضية اتضح إن المبتز كان متعود يبتز ناس كتير وله ضحايا كتير من بينهم بنات وأطفال وستات متزوجة.

آخر كلمة: ماتفوتوش قراءة: عصام حجاج عن قانون حبس الزوج اللي يضرب زوجته: دي حرب على الرجال في مصر

تعليقات
Loading...
Tweet
Share
Share
Pin