غضب بسبب صورة للعيبة منتخب مصر وهما بيعملوا استشفاء عضلي في برميل مياه!

الناس كلها مهتمة الفترة دي ببطولة أفريقيا وإيه اللي بيحصل فيها وعن أداء المنتخب في الماتشات اللي فاتت، ولإن جزء من مستوى أداء اللعيبة متعلق بأجواء الاستعدادات ومستوى الراحة والخدمة اللي بتتقدم، انتشرت صورة مؤخرًا لمحمد صلاح ولاعيبة لمنتخب مصر وهما بيعموا استشفاء في جردل بلاستيك فوق سطح فندق الإقامة في الكاميرون وكل واحد فيهم كان مستني دوره.

الصورة أثارت غضب الجمهور على مواقع التواصل وناس كتير علقت على الموضوع منهم محمد هنيدي وقال: “تخيل لما تكون بتلعب في أقوى دوري في العالم.. وبيتابع تدريباتك وتحضيراتك أفضل متخصصين في العالم.. وتضطر تعمل استشفاء في جردل طرشي بالشكل ده وتسكت عشان بلدك.. وسط تنظيم كارثي. كل الدعم والتحية لكل الاعيبة وبعثة المنتخب إنهم بيستحملوا كل المهازل بتاعت تنظيم البطولة دي عشان بلدهم وعشان يفرحونا”

وعلق تامر أمين في برنامجه وقال: “في صورة اتنشرت امبارح لما شُفتها شفت قد إيه لاعيبة منتخب مصر رجالة وأبطال. ولما محمد شوقي أو ضياء السيد أو كيروش بيتكلموا عن إنهم بيواجهوا صعوبات وأهوال كنت بقول الصعاب إيه يعني الجو ولا الأوتيل شوية. لحد ما شفت الصورة دي”. “لما شفت الصورة عرفت لاعبيتنا بيقاسوا قد إيه، اللجنة المنظمة الكاميرونية جايبة لنجوم العالم براميل طرشي عشان يعملوا استشفاء! لاعبيتنا بيطلعوا على سطح الأوتيل ويحطوا رجليهم في البراميل وفيها مياه ساقعة”.

“السولية حاجز مدتين وصلاح مستني دوره ماعرفش هو نمرة كام في البرميل؛ لما يورجن كلوب يشوف الصورة دي هيقول إيه؟ لما الشعب الليفربولي يشوف الصورة دي هيقول إيه!”

واختتم كلامه “وماحدش يقولي إمكانيات، ودي إيه علاقتها بالإمكانيات؛ مش عارف أجيب جهاز أو حوض سباحة صغير على سطح الأوتيل! إنما مش لاعبين ونجوم العالم وتمنهم بالمليارات يبقوا بيعملوا استشفاء في برميل بلاستيك فيه مياه ساقعة وبعدين بيقولوا في الآخر هو ليه الاتحاد الدولي مابيدوش أفريقيا تنظيم كأس العالم أو الأولمبياد”

ماكانش أول موقف غريب

في مواقف كتير غريبة حصلت من ساعة ما بدأت البطولة ماتخصش منتخب مصر لوحده، وفي خطأ وصفوه بكارثة تحكيمية كان بطلها الزامبي جاني سيكازوي، اللي أدار لقاء تونس ومالي في دور المجموعات، وقت لما قرر بشكل مفاجئ إنهاء المباراة بالدقيقة الـ85. وكرر ده تاني لما أنهى الماتش قبل الوقت الأصلي بـ10 ثواني من غير ما يعلن عن الوقت المحتسب بدل الضايع. و خطأ تاني في عزف النشيد الوطني لمنتخب موريتانيا. وسوء التنظيم في نقل اللاعبين من ملاعب التدريبات للفنادق لما اتأخر وصول حافلتهم بسبب الازدحام المروري فقرروا إنهم ينقلوهم في سيارات أجرة.

أخر كلمة: ماتفوتوش قراءة: المواقف الغريبة بتسيطر على بطولة أمم أفريقيا في أول أسبوع

تعليقات
Loading...