كل يوم بنستعمل فلوس بكل الفئات وعملات نقدية مختلفة، لكن عمرك ركزت في تصميمها وفي الآثار اللي مطبوعة عليها؟ فإحنا فكرنا في إننا إزاي بنشوفهم كل يوم ورغم كده مش كل الناس تعرف إيه هي الآثار اللي على العملات المصرية بمختلف فئاتها، واللي بتجمع بين الحضارة الفرعونية والحضارة الإسلامية في مصر، فتعالوا نشوف كل عملة وإيه الأثر اللي مطبوع عليها.
ربع جنيه
المسجد اللي مرسوم على وجه الربع جنيه هو مسجد السيدة عائشة، بيقع في القاهرة في حي الخليفة بشارع السيدة عائشة، وهي السيدة عائشة حفيدة سيدنا محمد عليه الصلاة والسلام، أما في ضهر الربع جنيه، مطبوع نسر صلاح الدين، اللي بيرجع وجوده لصلاح الدين الأيوبي، سلطان الدولة الأيوبية في مصر، والشعار اتوجد في قلعة صلاح الدين بالقاهرة، وتم إعادة استخدامه بعد ثورة يوليو في مصر، واتطور شكله مع الوقت وبقى شعار لمصر وكمان لعدد من الدول العربية.
50 قرش
جامع الأزهر على الوجه، ورمسيس التاني على الضهر، بأشهر أثرين للحضارة الإسلامية والحضارة الفرعونية في مصر، تم طباعتهم على الـ 50 قرش، جامع الأزهر واحد من أهم المساجد في مصر وأشهرها في العالم الإسلامي، تم إنشائه على إيد جوهر الصقلي لما فتح القاهرة، وهو المؤسسة الدينية الأكتر تأثيرا في العالم الإسلامي، أما رمسيس التاني على ضهر العملة، اللي عرّفه المؤرخين بأنه الفرعون الأكتر شهرة والأقوى طول عهد الإمبراطورية المصرية.
الجنيه
على وجهه جامع قايتباي، من أعرق الجوامع في مصر، وموجود في الروضة بمنطقة آثار مصر القديمة، وبناه السلطان الأشرف أبو النصر قايتباي، وعلى ضهر الجنيه مرسوم معبد أبو سمبل، اللي يعتبر من أشهر المعابد من العصر الفرعوني، وموجود في أسوان.
5 جنيه
على الوجه جامع بن طولون، واحد من أشهر الجوامع في مصر، بيرجع للعصر الطولوني، ولسه محتفظ بحالته الأصلية لحد دلوقتي، أما على ضهر الـ 5 جنيه، صورة فرعونية للإله حابي، إله النيل، وصورة بتمثل الخير والرخاء الموجود بنهر النيل اللي يعتبر هبة لشعب مصر.
10 جنيه
على الوجه جامع الرفاعي واحد من الجوامع الأثرية المشهورة في القاهرة، بيضم مقابر الأسرة الملكية اللي مدفون فيها الخديوي إسماعيل وأمه خوشيار هانم وزوجاته وأولاده، والسلطان حسين كامل وزوجته، والملك فؤاد الأول، والملك فاروق الأول.. أما الضهر عليه صورة الملك خفرع صاحب الهرم الثاني، ويُقال إنه أمر النحاتين بنحت الإله حورس خلف رأسه علشان يضفي على ملكه شرعية الحكم الإلهي على الأرض.
20 جنيه
قلعة صلاح الدين الأيوبي وجامع محمد علي اللي بداخلها، بالقباب فضية اللون، على طراز الجوامع العثمانية، أنشأه محمد علي باشا.. أما على الضهر، بتظهر صورة العجلة الحربية، واللي تعتبر أقدم سلاح يستخدم في الحروب، ظهرت عند هجوم الهكسوس على مصر.
50 جنيه
على الوجه جامع قجماس الإسحاقي الشهير بـ “أبو حريبة” الموجود في حي الدرب الأحمر، يعتبر من الجوامع الهامة اللي تم إنشائها في عصر قايتباي.. أما الضهر عليه صورة معبد حورس في مدينة إدفو، وهو تاني أكبر معبد في مصر بعد معبد الكرنك من حيث الحجم، وعلى جدران المعبد كتابات هيروغليفية بتلقي الضوء على الطقوس المتبعة لعبادة الإله حورس.
100 جنيه
على الوجه، جامع السلطان حسن وبيتكون من مسجد ومدرسة لكل مذهب من المذاهب الأربعة “الشافعي، والحنفي، والمالكي، والحنبلي”، أنشأه السلطان حسن بن الناصر محمد بن قلاوون، أما على الضهر تمثال أبو الهول، أقدم وأضخم تمثال ملكي في الحضارة المصرية القديمة وحارس لأهرامات مصر التلاتة، واللي تم نحته على هيئة جسم أسد ورأس إنسان.
200 جنيه
على الوجه، مسجد قاني باي الرماح، موجود قدام جامع الرفاعي في ميدان القلعة، وهو من الجوامع المعلقة ومبني على عقود مصلبة بتحملها أكتاف حجرية مربعة، أما على الضهر مرسوم الكاتب المصري الجالس، كاتب الملك خفرع، اللي بيجسد رمز العلم والثقافة، وبيعكس أهمية ومكانة الكاتب في الحياة المصرية القديمة.
وأحفاد اللي عملوا الحضارة العظيمة دي كلها، في منهم اللي قرر يدمج القديم بالجديد، عمرو موسى شاب عمل مشروع 3D للآثار اللي على العملات المصرية، لما اكتشف إن لما أي حد مش مصري بيشوف الفلوس المصرية بتعجبه، ومن ساعتها شاف الموضوع بنظرة تانية.