حرب على تويتر بعد تأهل الأهلي وبايرن ميونخ لنصف نهائي مونديال الأندية
إمبارح الخميس، وعلى ملعب المدينة التعليمية بالريان في قطر، تفوق النادي الأهلي المصري على غريمه الدحيل القطري في المباراة المنتظرة بعد ما أحرز حسين الشحات هدف الفوز في الدقيقة 30 وبكدا ضمن لفريقه التأهل لنصف نهائي المونديال. ودلوقتي العالم كله على أعصابه في إنتظار الماتش التاريخي اللي هيتلعب في يوم الإتنين 8 فبراير ما بين الأهلي وبايرن ميونخ الألماني.
وفي الساعات القليلة بعد فوز الأهلي على الدحيل، الصفحة الرسمية العربية لبايرن ميونخ على تويتر نزلت تويتة للماتش المنتظر وكتبوا فيها: “السداسية تنتظرنا يا شباب!”، الشئ اللي حرك ألاف من مشجعي الأهلي على تويتر يردوا بالنيابة عن النادي في معركة كروية شديدة أونلاين.
وللي ميعرفش إيه هي السداسية، دي إشارة لفوز نادي بـ 6 ألقاب في موسم واحد ودي حاجة متعملتش غير مرة واحدة في التاريخ على إيد الفريق الأسباني برشلونة في 2009. بايرن ميونخ فاز الموسم ده بالثلاثية الألمانية المحلية ودوري أبطال أوروبا والسوبر الأوروبي، واتبقى ليه على السداسية كأس العالم للأندية اللي بيفصلوا عنوا ماتشين بس، واحد منهم مع الأهلي.
مشجعين الأهلي مسابوش الموضوع يعدي بالساهل واستلموا صفحة بايرن ميونخ وبدأوا بالرد للدفاع عن فرصة ناديهم في الفوز، وكعادة المصريين معظم الردود كانت مصحوبة بالهزار وخفة الدم.
في 2013، وفي نهائي دوري أبطال الأندية أوشك الرجاء المغربي في إنه يوقف البافاريين في ماتش ناري ولكن للأسف انتهى بهزيمة الرجاء 2-0، لكن دلوقتي الدور جه على الأهلي إنه يحقق سداسيته الحمراء بعد الفوز في الدوري المصري وكاس مصر وبطولة أفريقيا للأندية هتكون بطولة كاس العالم للأندية هي البطولة الرابعة، وفي يوم 17 فبراير الأهلي على موعد مع فريق نادي النهضة البركانية المغربي لحسم لقب السوبر الأفريقي واللي هتكون البطولة الخامسة، أما السوبر المصري فهيكون هو البطولة السادسة.
ومن المتوقع للأهلي الفوز بكل من السوبر الأفريقي والسوبر المصري، ولكن الصعوبة هتكون في كاس العالم للأندية اللي تحطمت عليه الأحلام العربية أكتر من مرة. ولكن الأهلي بالرغم من كل شئ هو فريق قوي وقادر على الفوز وده لإنه أكتر النوادي مشاركةً في نسخة البطولة الحالية، وبالتالي فخبرته كبيرة، وده بيزود فرصه في تحقيق النصر على المنافس الألماني.
الفريقين بيحاولوا يحققوا حلم السداسية لكن كل فريق عقبة في طريق التاني، فهل تفتكروا البايرن هيعمل سداسيته ويرجع هيمنة القارة الأوروبية على كاس الأندية، ولا الأهلي هيفاجئ الجميع ويحقق سداسيته لأول مرة في تاريخه؟