اقتباسات إيجابية عربية هتبث فيك روح الأمل من تاني

في الأوقات الصعبة، ساعات كل اللي بيحتاجه الشخص هو إنه يصادف مقولة إيجابية، أو يقرأ اقتباس من اقتباسات لأحد كتابه المفضلين، اللي بتحط إبتسامة على وشه وتبقي زي زقة بسيطة تساعده إنه يكمل يومه بجرعة أمل زيادة عن الأيام اللي قبلها. ولأن الفترة دي بتعتبر من أصعب الاوقات اللي بتعدي علي العالم بشكل عام والشرق الأوسط بشكل خاص، قررنا نجمعلكم بعض الاقتباسات الإيجابية من بعض المؤلفين والكتاب العرب، علي أمل إنك تلاقي في واحدة فيهم الدواء لهمك أو تكون المقالة دي هي العلامة اللي انت مستنيها اللي تحسسك إن اللي جي أحلي، أو علي الأقل تبقي هي الزقة اللي إنت محتاجها عشان تنورلك يومك شوية زيادة.

جبران خليل جبران

عن: AraGeek

هناك من يتذمر لأن للورد شوكاً، و هناك من يتفاءل لأن فوق الشوك وردة

صدّقني لو فقدت ما فقدت لو كسّر الحرمان أضلاعك ، ستجتاز هذه الحياة ، كما يجتازها كل أحد ، فاختر الرضا يهُن عليك العبور

معظم اقتباسات جبران هتلاقيها بتحث على إن إحنا ننظر على الجانب الإيجابي، وبالرغم من إن الكلام ده يبان مش عملي أو صعب تنفيذه، لما تفكر نفسك دايمًا إن كل الناس مرت بحاجات مماثلة وأصعب بس عدتها في الآخر، وإن إنت نفسك جالك لحظات حسيت إن مستحيل شعور مؤلم يعدي وفي الآخر كل حاجة -عكس ما توقعت- عدت، الموضوع ممكن يهون شوية..

نجيب محفوظ

لا شيء يستحق الحزن . . دع الحزن للحمقى

الخوف لا يمنع من الموت لكنه يمنع من الحياة

نجيب محفوظ من العمالقة اللي بتشوف إنه من عدم الذكاء إهدار طاقة الإنسان ووقته، وكمان نفسيته على حاجات هي خلاص بالفعل حصلت أو هتحصل بغير إرادتنا، فالقدر كده كده هيسري، فمن الأحسن استغلال الحياة وإن إحنا منحطش أغلال وقيود علي نفسنا.. بنفسنا.

مصطفي محمود

السعادة لا يمكن أن تكون في المال أو القوة أو السلطة بل هي في (ماذا نفعل بالمال والقوة والسلطة)

المقولة دي بتبين لنا إن السعادة مش بتتجسد في الفلوس والقوة، فكتير منهم عندهم ده بس دايمًا مكون السعادة ناقص عندهم. فالفكرة كلها هي في إزاي ولأي اتجاه إنت بتختار إنك تستغل اللي عندك، مهما كان بسيط.

شمس التبريزي

عن: Fadaktrains

لا تهتمي إلى أين سيقودك الطريق، بل ركزي على الخطوة الأولى. فهي أصعب خطوة يجب أن تتحمل مسؤوليتها. وما إن تتخذي تلك الخطوة دعي كل شيء يجري بشكل طبيعي وسيأتي ما تبقى من تلقاء نفسه. لا تسيري مع التيار، بل كوني أنتِ التيار.

إذا أراد المرء أن يغيّر الطريقة التي يعامله فيها الناس، فيجب أن يغير أولاً الطريقة التي يعامل فيها. وإذا لم يتعلم كيف يحب نفسه، حبًا كاملاً صادقًا، فلا توجد وسيلة يمكنه فيها أن يحب. لكنه عندما يبلغ تلك المرحلة، سيشكر كل شوكة يلقيها عليه الآخرون. فهذا يدل على أن الورود ستنبهر عليه قريبًا..

بتركز المقولات دي علي جانب مختلف شوية، وهو حب النفس. فالسعادة بتيجي لما بيقرر الانسان إنه مايشوفش نفسه ضحية الظروف، ولكن يبدأ يشتغل علي نفسه واحترامها، وكل حاجة حلوة بعد كده هتجيلوا من نفسها.. بس هو يبدأ.

أنيس منصور ومصطفي السباعي

إن السعادة تنتقل بالعدوى ..لا تنتظر عدوى أحد .. كن حاملاً لهذا الميكروب

-أنيس منصور

إذا نظرت بعين التفاؤل إلى الوجود، لرأيت الجمال شائعاً في كل ذراته

-مصطفي السباعي

الاقتباسات دي هتلاقيهم بيتكلموا عن فكرة “الطاقة” وإن تفكير الشخص هو اللي بيحدد شكل الدنيا هيبقي إزاي في عينيه. فالسعادة عشان تحس بيها من بره، لازم تنبع من جواك، وده مش كلام إنشاء أو تنمية بشرية، ولكنه واقع بيُثبت كل يوم من تجارب الحياة ومن أمثلة حقيقية لناس بتفكر بالطريقة دي وفعلاً بتعرف تلاقي السعادة، أو علي الأقل بيبقوا في طريقهم ليها. الدنيا فيها نعم وحجات حلوة كتير، أكبر من المشكلة اللي مأزمة لنا حياتنا.. بس إحنا محتاجين نبص للصورة الأكبر للحياة.

أحمد خالد توفيق

عن: GoodReads

الثقة بالنفس كلام فارغ ..سوف يدهشك كم الأشياء التي لا تعرفها أو لا تجيدها .. المهم أن تثق بقدرتك على أن تكون أفضل ..

لو إنت من الأشخاص اللي مستنيه توصل للدرجة المثالية في الثقة بالنفس علشان تحس إنك راضي وسعيد، يبقي هتفضل دائمًا في حالة بحث. لإن مستحيل إن الشخص يقدر يلم بكل حاجة في الدنيا، والثقة بالنفس شيء متغير ومش ثابت.. وده طبيعي. كل اللي محتاجة الشخص إنه يتقبل فكرة إن مفيش كمال في أي حاجة وإن كل اللي محتاجة هو إيمانه إنه هيفضل في رحلة تطوير من النفس المستمر.. وهو هيحس بالسكون والراحة الحقيقية.

زي ما بيتقال، “إذا كانت الجهة المُقابلة لك تحتوي على عشب أكثر اخضرارًا مما لديك توقَّف عن التحديق به، توقَّف عن المُقارنة، وكُفّ عن الشَكْوَى، وابدأ في سقْي العشب الذي تقف عليه”..

آخر كلمة: إيه أكتر مقولة بتأثر فيكم وبتديلكم أمل؟ شاركونا رأيكم في التعليقات..

تعليقات
Loading...
Tweet
Share
Share
Pin