استغلال إنساني للتكنولوجيا: تطبيقات بتساعد ذوي الاحتياجات الخاصة بطرق مختلفة

بطريقة جميلة، ناس فكرت ازاي ممكن تستخدم التكنولوجيا في إنهم يساعدوا ناس أكتر، بما إن التكنولوجيا في الطبيعي بتسهل حياتنا وبتوفر علينا مجهود كبير، فكروا ازاي ممكن يساعدوا ذوي الاحتياجات الخاصة ويسهلوا عليهم حاجات كتير بيقابلوها في يومهم، عن طريق تطبيقات على الموبايل، تخليك تساعد بطريقة سهلة جدًا، وتعمل حاجة بسيطة لكنها فارقة في حياة غيرك، مجرد مثلًا ما تفتح الميكروفون في موبايلك وتقول كلمة أو اتنين، تغير بيهم يوم شخص للأحسن بإنك سهلت عليه عقبة قابلته في يومه، تعالوا نشوف ازاي ونشوف إيه الأبليكيشنز دي.

Be my eyes

عن: arb android

أبليكيشن بيساعد المكفوفين أو اللي نظرهم ضعيف، بمساعدة أشخاص تانية، عن طريق إن الشخص الكفيف بيفتح الكاميرا لشخص عادي، ويسأله عن حاجة هو مش شايفها، زيّ مثلًا إنه يسأله على لون لبس، وهل لايق على بعضه ولا لأ، والشخص التاني مش مطلوب منه أكتر من إنه يفتح المايك ويجاوبه على اللي محتاجه. التطبيق بيسمح للمبصرين مساعدة المكفوفين بطريقة بسيطة وفي وقت مايتعداش دقايق.

Accessible places

وده للأشخاص اللي بيعانوا من إعاقة حركية وبيعتمدوا على الكراسي المتحركة، وبيواجهوا صعوبة في توافر الأماكن المؤهلة لخدمة الأشخاص اللي بيتنقلوا بالكرسي المتحرك، الأبليكيشن ده بيقدم خريطة بتوضح الأماكن اللي تقدر تستخدمها بالكرسي المتحرك، سواء كافيهات أو مطاعم أو محطات أو بنوك، وبيعتمد على تجارب سابقة لناس تانية هما اللي بيقولوا إن المكان ده تقدر تروحه بالكرسي المتحرك عن طريق تقييمهم للمكان.

Swift Braille

عن: devpost

التطبيق عبارة عن لوحة مفاتيح خاصة لأجهزة الأندرويد، بيوفر للكفيف وضعاف البصر الطباعة بطريقة لغة برايل، مش بالضغط على النقط، لكن عن طريق توصيل النقط للخروج بالحرف/الرمز/الرقم أو ما يمثله في لغة برايل باستخدام صباع واحد على الأقل، كمان يتم قراءة كل حرف، رمز، أو رقم بيتم إدخاله من المستخدم، ويمكن للمستخدم التحكم بالنصوص زيّ إنه يشيل الحرف، الكلمة، أو النص كله، من خلال الإيماءات أو من قائمة.

Let me talk

أبليكيشن لمساعدة الأشخاص اللي بيواجهوا صعوبة في الكلام، عن طريق إنه بيترجم الكلمات الغير مفهومة لنص بيساعد الأشخاص على فهمه بطريقة أسرع وأسهل، والميزة في الأبليكيشن ده إنه متوفر بكل اللغات، هو بيعمل على إنشاء معجم خاص بالمستخدمين وبيحفظ الأصوات اللي بتصدر عنهم وبيربطها بالكلمات المناسبة أو المشابهة ليها.

Listen at home

عن: APKPure

وده بيساعد الأشخاص اللي بيعانوا من ضعف السمع، في البداية بيعمل اختبار لحاسة السمع علشان يحدد درجة السمع بالظبط، وبعدها بيحدد الكورس اللي الشخص مفروض يمشي عليه علشان يقوي حاسة السمع عنده، وبيرشح فلاتر ومؤثرات بتخلي حجم الصوت المحيط يبقى مناسب درجة السمع عند الشخص.

Avaz 

بيساعد الأشخاص اللي بيعانوا من التوحد وخصوصًا الأطفال، بطريقة جذابة بيشجعهم على الكلام عن طريق عرض صور تخلي الطفل يبقى عنده رغبة في نطق اسمه، وتدريجيًا بيعلمه ينطق جملة كاملة بسهولة.

آخر كلمة: ماتفوتوش قراءة: جمعنالكم تطبيقات هتساعدكم تحموا أطفالكم على الإنترنت..

تعليقات
Loading...
Tweet
Share
Share
Pin