جمعنالكم تطبيقات هتساعدكم تحموا أطفالكم على الإنترنت

0

أغلب الأطفال دلوقتي بيقضوا وقت كبير على الإنترنت في أنشطة كتيرة، ومن وقت ظهور فيروس الكورونا، وفرض العزل المنزلي، زادت معدلات استخدام الأطفال لتليفوناتهم في وقت أكتر من العادي بسبب عدم إتاحة أنشطة تانية بديلة ليهم. ومع زيادت معدلات استخدامهم للتكنولوجيا، بتظهر مسئولية أكبر على الوالدين إنهم يتابعوا الأطفال ويحموهم من أي حاجة تشكل خطر عليهم على الإنترنت، زي الاختراق، والتنمر، والتعرض لمحتوى غير مناسب، أو إنهم يقوموا بمشاركة بياناتهم الخاصة مع حد مجهول.

عن: Nogoum Fm

وكمان المتابعة المستمرة للأطفال هتساهم في إدارة وقتهم، والتحكم في الأوقات اللي يستخدموا فيها الموبايل علشان يقدروا يمارسوا أنشطة تانية ويبعدوا عن الإفراط في اللعب. وعلشان كده هنقدملكم النهاردة مجموعة من تطبيقات حماية الأطفال على النت في الشرق الأوسط هتساعدكم على حمايتهم، والرقابة عليهم. والتطبيقات دي متوفرة على Google play وApp Store .

تطبيق Qustodio

التطبيق ده بيوفر أدوات بسيطة لإدارة الوقت اللي بيستخدم فيه الأطفال تليفوناتهم، وكمان فلترة المحتوى اللي بيتعرضله الأطفال، ومراقبة أو حظر أي تطبيقات تختاروها.

أهم حاجة بتميز التطبيق ده هي خاصية (panic button) ودي بتتيح لطفلك الوصول ليك بسرعة في أي وقت يحتاج المساعدة فيه. والخاصية دي بتشتغل عن طريق إرسال مكان وجود طفلك ليك وقت ما يدوس على أيقونة الpanic button، وده هيتم باستخدام نظام تحديد المواقع (GPS) علي موبايل طفلك.

تطبيق App Block

وده بيتيح قفل التطبيقات اللي تختارها، بالوقت اللي أنت عايزه، وده هيساعدك في قفل تطبيقات التواصل الإجتماعي والألعاب أثناء مذاكرة أطفالك. وكمان بيتيحلك قفل التطبيقات علي موبايلاتهم لوقت محدد كل يوم، فمثلاً لو عايز تشجعهم على الالتزام بوقت معين لوجبة كل يوم مع العيلة، ممكن تحدد وقت معين كل يوم لقفل التطبيقات علشان تشجعهم يلتزموا بمعاد الأكل مع العيلة. وكمان التطبيق هيخليك تعرف مدة استخدام كل تطبيق على الموبايل قد إيه.

تطبيق Mobicip

عن: aitnews

وده بيعتبر أشهر تطبيقات الرقابة الأبوية بسبب إنه بيقدم أكتر من ميزة، أهمهم إنه بيدعم مراقبة كلمات مفتاحية رئيسية زي “لا تخبر”، أو “ما هو رقم هاتفك” و بيبعتلك فورا لو تم إرسال رسائل بالكلمات دي. وأنت تقدر كمان تزود كلمات المراقبة، والأبليكيشن فيه مميزات تانية زي إنه بيلتقط screenshots من موبايل طفلك بشكل دوري، وبيخليك متابع كل أنشطته على الموبايل سواء التصفح أو الصور اللي بيشوفها.

وكمان الصور والنصوص اللي بيبعتها لأي حد، وكمان في خاصية تتبع الموقع الجغرافي لموبايل الطفل، وعرض سجل التصفح لكل البرامج والتطبيقات على موبايله. التطبيق ده بيوفرلك اشتراك مجاني لمدة شهر، وبعدها بتختار خطة الأسعار اللي تناسبك.

تطبيق Net Nanny

الأبليكيشن ده بيعتمد على حظر المحتوي الخطير أو المشكوك فيه قبل ما يوصل للطفل. ومن المميزات اللي فيه خاصية (Family feed)، ودي خاصية بتبعتلك كل اللي بيبحث عنه طفلك في تليفونه، وكل التطبيقات اللي بيستخدمها، ده غير عمليات الفلترة، ومراقبة الأنشطة اللي بيقوم بيها الطفل على الموبايل.

تطبيق Safe kids

أكتر حاجة بتميز Safe kids هي القدرة على فرز المواقع حسب الفئة، زي فرز الصفحات والبرامج اللي بتتضمن محتوى البالغين، أو بتحتوي علي كلمات بذيئة، أو معلومات عن المخدرات، أو أي محتوى غير لائق، طبعًا غير باقي المميزات زي تحديد الموقع الجغرافي، وحظر المواقع اللي تختارها.

التطبيقات دي هتساعدكم تتحكموا في المحتوى اللي أطفالكم بيتعرضوا له، والأوقات اللي بيتعرضوا فيه للإنترنت عمومًا. لإن الأطفال خصوصًا دلوقتي بيكونوا عرضة لمحتوى ماينفعش يتعروضوا له فعلًا.

أخر كلمة: تطبيقات حماية الأطفال مش هتقدر لوحدها تتحكم في سلوكيات استعمال الإنترنت، لازم تكونوا مع أولادكم و تدعموهم.

تعليقات
Loading...