في اكتشاف علمي جديد: سم النحل لعلاج سرطان الثدي

0

“السم في العسل” جملة متعودين على معناها السلبي أو الخبيث، بس دلوقتي هتعبر عن علاج لمرض سرطان الثدي، اللي علاجه صعب ومؤلم جداً، في اكتشاف علمي مذهل زي ما وصفه العلماء. فبحسب دراسات علمية جديدة تمت في استراليا، اكتشفوا أن المركبات الموجودة في سم نحل العسل بتساعد بشكل كبير في علاج سرطان الثدي عن طريق معالجة الخلايا المعادية للسرطان، ومن غير أضرار تصيب الخلايا السليمة.

الفريق الباحث اختبر السم علي أنواع مختلفة من سرطان الثدي اللي ليها علاج محدود في فاعليته، ولقوا إنه بيدمر الخلايا السرطانية في وقت قليل جداً، حوالي 60 دقيقة. والمادة اللي بتعالج السرطان من السم، هي مادة الميلتين اللي بيستخلصوها من السم، و بيعيدوا تكوينها و معالجتها بتركيز معين، وبعد التجارب تم إثبات فعاليته في تقليل الرسائل الكيميائية لنمو الخلايا السرطانية، وتقليل إنقسامها.

وأكد العلماء إن المادة دي بتعالج نوعين من سرطان الثدي، فهي بتقتل خلايا سرطان الثدي المخصب، وخلايا سرطان الثدي الثلاثي السلبي اللي بيشكل نسبة من 10 – 15% من جميع سرطانات الثدي، واللي يعتبر لحد دلوقتي ملوش علاج فعال.

العلماء استخدموا في الدراسات اللي اتعملت حوالي 300 نحلة من مناطق مختلفة زي إنجلترا، و أيرلندا، و استراليا الغربية، كجزء من البحث، و كل النتايج أكدت الاكتشاف، وكمان لسة في تجارب وأبحاث مستمرة للحصول على نتائج أدق.

آخر كلمة: آلاف العناصر الكيميائية تقدر تقضي علي الخلايا السرطانية في بيئة مختبرية، لكن العلماء بيقولوا إن قليل جداً منها اللي ممكن ُيستخدم مع البشر.

تعليقات
Loading...