إتكلمنا مع الفنانة المصرية هناء السماك عن الرسم لتغيير المجتمع للأحسن والتعبير عن المرأة القوية وده اللي حصل..

شوفنا في الفترة اللي فاتت فنانين ومشاهير كتير بيعملوا مبادرات مختلفة علشان يساعدوا الكل على الخروج من فترة الحجر الصحي بسلام، نفسيًا وجسمانيُا، سواء بالتبرع بجزء من أجورهم أو بمشاركة أفكارهم مع جمهورهم على السوشيال ميديا.

وكمان الفترة دي أدت الفرصة لمواهب كتيرة إنها تظهر وتشاركنا فنها على السوشيال ميديا، وواحدة من الفنانين الجداد اللي بيستخدموا منصاتهم في تحقيق أحلامهم وعمل تغيير إيجابي في المجتمع عن طريق فنهم هي هناء السماك.

بواسطة: فيسبوك

هناء هي طالبة إدراة أعمال من الإسكندرية، وكان الرسم بالنسبالها مجرد هواية لحد ما أتفاجئت برد الفعل الإيجابي على لوحاتها، وكمية الناس اللي عاوزة تشتري شغلها. ومن هِنا قررت إنها تحقق حلمها، وتعمل مبادرة خيرية تتبرع من خلالها ب 100% من أرباحها.

بواسطة: فيسبوك

من بداية انتشار أزمة فيروس الكورونا في مصر لحد دلوقتي، قدرت هناء إنها تساعد مستشفى الإسكندرية الجامعي وتشتري معدات طبية للدكاترة والممرضين اللي بيحاربوا في الصفوف الأولى ضد الفيروس، وكمان شاركت في تزيين منطقة الحجر الصحي للمسنين في دار الهداية للمسنين في اسكندرية علشان تساهم في رفع روحهم المعنوية في الوقت اللي بيقاوموا فيه الفيروس.

بواسطة: فيسبوك

أغلب لوحات هناء بتمثل المراة بأشكال وألوان مختلفة ولما سألنها عن السبب في ده قالتلنا “انا كان دايمًا حوليا ستات وقائدات قويات، وأنا مؤمنة إننا لازم نعرف قصص النساء من كل حتة في الدنيا ونقدرها”. وحتى اسم البراند بتاعتها “Art of Nushu” بيدعم أفكارها النسوية لأنه معناه أسلوب كتابة خاص بالنساء في الصين، وهي شايفة إن منصتها معمولة علشان تعرض قصص كل البنات والستات وتنشرها بينا كلنا.

حاليًا، هناء بتتعاون مع مؤسسة نية الخيرية، وهتتبرع بكل أرباحها من لوحاتها اللي جاية ليهم. وهي بتسعى إنها تزود نشاطها علشان تقدر تجمع مبالغ أكتر تساعد بيها في الظروف الاستثنائية اللي بنمر بيها كلنا.

آخر كلمة: لو حابب تعرف أكتر عن لوحات هناء ومبادراتها، تقدر تشوف كل شغلها من هنا.

تعليقات
Loading...
Tweet
Share
Share
Pin