فاز اثنين من المقيمين في دولة الإمارت وواحدة من زوار الدولة من الباكستان بمليون درهم في مشروع جوايز إمارات لوتو. وبعد ما قسموا المبلغ بينهم، هيروح كل واحد فيهم بيته بمبلغ 333 ألف و 333 درهم. الفايزين قالوا إن الوقت ده أنسب وقت ياخدوا فيه الجايزة دي خصوصاً في ظل ظروف العزل والحجر الصحي الصعبة اللي بنعيشها كلنا اليومين دول.
إمارات لوتو هو أول مشروع رقمي في دول مجلس التعاون الخليجي بيتيح للمشترين حرية اختيار الدخول في سحب إسبوعي مجاني على جوائز نقدية قيمة. والمشروع ده اتنفذ بالتماشي مع مبادرات الحكومة الأماراتية اللي بتهدف لتحسين مختلف جوانب الحياة في المجتمع الإماراتي والدولة على نطاق أوسع.
إمارات لوتو هو مشروع اليناصيب الحلال الوحيد في العالم، وفي فتوى من الهيئة العامة للشؤون الإسلامية والأوقاف في أبوظبي بتقول إنه متوافق مع تعاليم الشريعة الإسلامية، والفتوى دي موجودة على الموقع الرسمي لإمارات لوتو.
والفائزين في يناصيب الأسبوع ده هما كلير أنطوانيت من دولة الفلبين اللي عندها 33 سنة وبتشتغل في السوق الحرة في الشارقة، وفوزان ديشموخ مدير المبيعات لشركة شحن بضائع عنده 30 سنة من دولة الهند، وسيدة من دولة الباكستان عندها 66 سنة طلبت عدم ذكر اسمها.
قالت كلير بعد ما أخدت الجايزة إنها تقدر دلوقتي تبدأ مشروع تجاري خاص بيها، وتحتفظ بجزء من الفلوس علشان تقدر تغطي مصاريف تعليم إبنها في المستقبل. وإن هي مستنية إعادة فتح رحلات الطيران علشان تستقيل من شغلها وترجع بيتها بعد كام شهر. وإن إبنها هو اللي إختار الرقم علشان هو محظوظ بالنسبة ليها وإنها ممتنة جداً للفوز الكبير ده. وبتخطط كلير كمان لتقديم المساعدة لزملائها اللي عندهم مشاكل مالية، وقالت إنها عاوزة تساعد سيدة مسنة عايشة في الفلبين.
وبالنسبة لفوزان فهو قال إنه كان عنده ديون كتيرة وكان قلقان لأنه مكنش عارف يسدها، وإن الجايزة دي جاتله كأنها معجزة، وإنه لسة في حالة صدمة ومش قادر يصدق إنه فاز بالمبلغ ده. فوزان كان هيبكي من الفرحة لما جاتله مكالمة الجايزة وعرف إنه فاز، وعبر عن امتنانه وحماسه الشديد لمساعدة غيره بمجرد ما يدبر أموره.
ومن ناحية السيدة الباكستانية فهي كانت في زيارة لإبنها في عجمان، واضطرت لتمديد إقامتها في الإمارات بعد إلغاء جميع الرحلات الجوية. وقالت للمنظمين إنها عاوزة تستخدم الجائزة لدعم أسرتها، وخصوصاً بنتها وأطفالها الأربعة اللي توفي زوجها بشكل مأساوي من سنين قليلة فاتت.