رحلة حضارات هتقابلها وأنت بتزور أشهر معابد في أسوان

أسوان من المدن القليلة اللي تقدر تحكيلك تاريخ بلد بأكملها، مدينة عالمية اكتسبت شهرتها الواسعة من التاريخ اللي شايله في كل ركن فيها، واللي بيزودها اختلاف وتميز وجود نهر النيل اللي حاضنها، واللي خلاها تجذب آلاف السياح على أرضها، هتلاقيها في حتة لوحدها كده بعيدة عن الدوشة والزحمة، فلو حابب تزور المدينة وتركب الفلوكة وتسمتع بجوها الدافي وتتعرف على تاريخ حضارة من خلال آثارها وتحس إنك رجعت 7 آلاف سنة لورا وسط الملوك وحكاويهم، لازم وأنت هناك تعدي تشوف أشهر المعابد، بس قبل ما تروح لهم هنقولك نبذة عن كل واحد فيهم وتروح لهم امتى والأسعار عاملة ازاي.

معبد أبو سمبل

عن: سطور

واحد من أشهر المعابد في العالم، أبو سمبل أو رمسيس التاني، هو في الحقيقة معبدين مش معبد واحد، المعبد التاني بيخص الملكة نفرتاري بس حجمه أصغر شوية وكان مخصص لعبادة حتحور، ولحد دلوقتي المعبدين دول بيمثلوا لغز علمي في الهندسة المعمارية.

أبو سمبل موجود حاليًا غرب بحيرة ناصر حفاظًا عليه من أثر الغمر بمياة النيل، أنشئ في القرن الـ 12 قبل الميلاد، هتلاقي وأنت داخل المعبد أربع تماثيل ضحمة للملك رمسيس التاني، وتماثيل تانية صغيرة لوالدته ولزوجته، الملكة نفرتاري، وأولاده، وواحدة من الحاجات اللي تبين لك تقدم علوم الفلك في الوقت ده هو إنك هتشوف تعامد الشمس مرتين على وجه تمثال الملك كل سنة، مرة يوم ميلاده ومرة يوم تنصيبه.

مواعيد المعبد يوميًا من 5:00 صباحًا لحد الساعة 6:00 مساءً، وده موقعه على الخريطة.

وبالنسبة لأسعار التذاكر؛ الدخول 30 جنيه للمصريين والطلبة 10، و150 جنيه للجنسيات التانية، وعروض الصوت والضوء 65 للمصريين والعرب و260 لغير المصريين.

معبد فيلة

عن: cnn

من أشهر المعابد الفرعونية القديمة، موجود في وسط نهر النيل على جزيرة أجليكا جنوب بحيرة ناصر، بعد ما اتنقل من جزيرة فيلة في الستينيات إنقاذًا له، في عملية شديدة التعقيد استمرت تسع سنين وشارك فيها دول كتير واستخدموا فيها أساليب تكنولوجيا متطورة، تاريخ المعبد بيرجع للقرن التالت قبل الميلاد وقت عبادة الإله إيزيس، علشان توصل للمعبد لازم تمر برحلة نيلية هتشوف فيها كل المناظر الطبيعية الخلابة، ولما توصل هتلاقي في المعبد كل اللي بيعبر عن الحضارة الفرعونية في القرن التالت قبل الميلاد، مع لمسات للعصور اليونانية الرومانية والبيزنطية اللي مرت على مصر، وهتشوف ده من خلال الأعمدة والجداريات.

أسعار دخول المعبد؛ 30 جنيه للمصريين و10 للطلبة وللجنسيات التانية 200 للأجنبي و100 للطالب الأجنبي.

المواعيد من 7 الصبح لـ 5 مساءً في الصيف، ولحد 4 عصرًا في الشتاء، وتقدر توصل للمكان من هنا.

معبد الكرنك

عن:travo

من معابد الأقصر وأسوان اللي معروفة بالألغاز الهندسية الغامضة، بيضم 134 عمود في ساحة واسعة ومدخل على هيئة ممر طويل، هتلاقي فيه على كل جانب منحوتات للكباش وعشرات القاعات والتماثيل والمجسمات الحجرية، واللي الناس ماتعرفوش إن ده مش معبد واحد، ده مجمع معابد بيضم 11 معبد مختلف علشان كده بيسموه مجمع الأديان، تاريخ بنائهم بيزيد عن 4500 سنة، وده يمكن اللي مخليه أقدم دار عبادة في التاريخ البشري وأكبرها، لإنه اتشيد على 46 فدان، ده غير إنه اتخصص لعبادة آمون رع وزوجته وابنهم خونسو.

مواعيد زيارة المعبد كل يوم من الساعة 6:00 صباحًا لحد الساعة 5:30 مساءً، والتذاكر 30 جنيه للمصري و10 للطالب المصري و220 للأجنبي و110 للطالب الأجنبي، وتقدر توصل له من هنا.

معبد كلابشة

عن: travo

موجود على بعد ١٦ كم من السد العالي في جزيرة وسط بحيرة ناصر، وتقدر توصل له عن طريق فلوكة في النيل.

بيعتبر تاني أكبر معابد النوبة، اتبنى في السنين الأولى من العصر الروماني وتحديدًا قبل الميلاد بتلاتين سنة، وبالتالي هتلاقي تصميمه مختلف عن باقي المعابد ومستمد من الرومانية، المعبد كان مخصص لعبادة الإله ماندوليس، إله الشمس النوبي، وعلشان كده هتلاقي تصميم المعبد معمول بحيث إن الشمس تتعامد على حجرة “قدس الأقداس” مرتين في السنة، وأهم اللي بيميز المعبد هو النقوش اللي بتحكي كتير عن تاريخ الفترة دي، زيّ نقوش مرتبطة بإيزيس وأوزوريس وحورس وبتاح، ده غير النقوش المسيحية، وفي سنة 250م اتعمل نقوش جديدة في المعبد لمنع تربية الخنازير أو دخولها.

المواعيد الرسمية من 8 الصبح لـ 4 مساءً، وسعر التذكرة للأجانب 60 وللطلبة الأجانب 30 جنيه، أما المصريين فسعر التذكرة 10 جنيه ومكانه هنا.

معبد كوم امبو

عن:travel

بيعرفوه بالمعبد المزدوج غير العادي، لإن تصميمه مزدوج وبيحتضن محاكم وقاعات وغرف لإله “التمساح سوبك” وإله “الصقر هاروريس”، اتبنى لعبادة الإلهين دول في عهد البطالمة وبالتحديد في عهد الملك بطليموس السادس، بس في البداية كانوا بيستخدموا المعبد كمشفى في الفترة ما بين السنة 180 للسنة 47 قبل الميلاد، وبتشير النصوص والنقوش اللي موجودة للـ “ليتورجية” وترجمتها علم “اللاهوت”، بجانب إن المعبد بيحتضن عدد من مومياوات التماسيح التلاتة اللي اكتُشفت في منطقة متحف التمساح، وأكيد بتسأل يعني إيه كوم امبو، الكلمة على بعضها معناها “الذهبية” وكوم لوحدها معناها “التلال”.

المواعيد من 6 الصبح لحد 8 بليل، وسعر التذكرة للأجنبي 160 والطالب 80 جنيه، وللمصريين 30 جنيه وتقدر توصل له من هنا

أفضل وقت لزيارة أسوان في فترة الشتاء، يعني في نص شهر أكتوبر لنهاية شهر يناير، هتلاقي هناك الجو معتدل ومافهوش لسعة البرد، بالعكس هتلاقي دفا والجو هيبقى مشمس، ودرجة الحرارة هتبقى حوالي 25 درجة مئوية، وده أفضل جو علشان تقدر تتمشى وتشوف معالم أسوان ومعابدها.

آخر كلمة: ماتفوتوش قراءة: اكتشاف مقبرة أحد سياسيين رمسيس التاني وربما مومياء نفرتيتي

تعليقات
Loading...
Tweet
Share
Share
Pin