مسلسل يعتبر واحد من أهم دراما الرعب اللي اتعملت في مصر والوطن العربي، أبواب الخوف، 15 حلقة لكن كل واحدة بتناقش أسطورة رعب مصرية، والبطل نفسه قصته طول المسلسل إنه بيقدر يشوف الخوارق والأحداث الغريبة، وعنده اتصال بالأرواح والماورائيات، وله طبيعة شخصية خاصة منعزلة وهادية، وبيقدر يشوف حاجات غيره كتير صعب يشوفها، وبيقدر يتنقل لحياة أشخاص تانية ويعرف قصصهم المرعبة.
المسلسل لفت نظرنا لإن عندنا قصص وأساطير بتحسسنا بالخوف والرعب أكتر من قصص في أفلام أجنبية مصروف عليها ملايين، ممكن علشان القصص قريبة مننا نوعًا ما، يعني لما بتلاقي على الشاشة النداهة، أو ساحر بينبش في القبور علشان يدفن أعمال سحر، وبيتعامل مع الجن والجثث، هتترعب أكتر ما تشوف خيال ولا قاتل متسلسل في فيلم بعيد عنك بقارّتين تلاتة.
تسلسل الرعب المصري
من واحنا صغيرين، بنترعب لما نكون بنقلب في التليفزيون ونصادف فيلم (الإنس والجن) أو (التعويذة)، وبنجري من على القناة اللي شغال عليها، ولو لقينا (دراكولا) بنسيبه عادي. لكن الأفلام العربي دي كانت ممكن تخلينا مش بننام أسبوع لو اتفرجنا عليهم، فاكر مثلًا رجل المعزة اللي عبلة كامل لقتها في الصالة فجأة؟ مع إن لما كبرنا بيضحكنا صورة العفريت في آخر فيلم التعويذة وهو خارج من جدار الأسانسير، بس واحنا صغيرين فكرة الجن ودخولهم عالمنا كانت مرعبة -وممكن لحد دلوقتي- وماكناش بنقدر نتفرج.
ولا عادل إمام وهو بيتلاشى في فيلم الإنس والجن وبيظهر ويختفي، ويبقى خيال، ولما أخد الفنانة يسرا علشان يعرفها على عيلته، وطلع إن البيت ده مهجور بقاله سنين وكل اللي شافته والناس والحفلة، كل ده كان جن.
أساطير محلية
في المسلسل، شوفنا عدد من الأساطير اللي سمعنا عنها في تراثنا في المجتمع، ومنهم اللي اتعملت في أفلام أو مسلسلات قبل أبواب الخوف، لكن المسلسل قدمها بطريقة غير تقليدية، ومع موسيقى وتمثيل حقيقي من الأبطال، بدون مبالغات ومكياج ومؤثرات مصطنعة، قدر المسلسل يوصلنا الحواديت والأساطير دي بمنتهى الدقة.
- نبّاش القبور: واحدة من أكتر الحلقات المرعبة اللي اتعملت في مسلسل أبواب الخوف، وناس كتير بتترعب لما بتشوفها لحد دلوقتي حتى واحنا كبار. الحلقة بتناقش قضية موجودة فعلًا في المجتمع، وبتدور الحلقة عن شخص بيشتغل في أعمال السحر، وبيستخدم القبور وجثث الموتى علشان يدفن معاههم أعمال السحر اللي بيعملها.
- النداهة: الأسطورة الأشهر في القرى المصرية، اتعملت في المسلسل بطريقة مختلفة، من غير ما يخلّوا الممثلة بمكياج كتير ولا طالع لها قرنين ولا حاجة، ومع ذلك قدرت توصل لك إحساس الخوف، وقدرت تجذب الشخص المطلوب، واكتشفنا ضحاياها، وطبعًا بيساعد في ده التصوير والموسيقى كمان اللي لعبت دور مهم في المسلسل.
- الجن العاشق: القصة دي من أكتر الحلقات المرعبة اللي كانت في المسلسل، والقصة دي بنسمع عنها في الحقيقة والله أعلم يعني، بس الحلقة كانت بتتكلم عن جن عشق بنت واتجوزها وخلف منها وماتت وهي بتولد الجنين ده. قصة الجن العاشق اتعملت برضه في فيلم الإنس والجن، وكانت قصته الأساسية، وعادل إمام بيحب يسرا وبيحاول يخليها تدخل عالمه.
- بوابة بين العالمين: من زمان بيتقال لنا مانلعبش في الحاجات دي وناخدها بهزار، وده اللي حصل في حلقة فيها 3 بنات أصحاب قرروا يلعبوا لعبة يستدعوا فيها جن يسألوه عن حاجات في حياتهم عايزين يعرفوها، وهما في جلسة التحضير واحدة منهم هزرت وخضتهم، فالتفسير اللي حصل إنهم قفلوا البوابة على الجن اللي استدعوه في الجلسة وتسببوا في وفاته، وعشيرته انتقمت منهم بطرق مختلفة.
ممكن ناس كتير تشوف إن الرعب ماخدش حقه في السينما والدراما العربية، وفي أفلام كتير بتندرج تحت بند الكوميديا مش الرعب، زي فيلم كامب مثلًا، وأفلام ومسلسلات تانية ماسمعناش عنها حتى. لكن برضه القصص غنية وتستحق يتعمل عنها أفلام ومسلسلات تستحق المشاهدة، زي أبواب الخوف.