سمعنا امبارح خبر عن وقف المذيع المصري حسام حداد عن العمل وإحالته للتحقيق بسبب تصريحاته فيما يخص النادي الأهلي، وقالت الهيئة الوطنية للإعلام في بيان لها إنها بتقف على مسافة واحدة بين كل الأندية المصرية وبتتعامل بحيادية تامة.. طب إيه اللي قاله المذيع والهيئة اعتبرته غير حيادي ويمثل رأيه؟
حسام حداد قال نصًا “هل النادي الأهلي يمثل مصر؟ لأ النادي الأهلي لا يمثل مصر، هو بيحمل اسم مصر أه، بس هو يمثل نفسه في المقام الأول ومن ثم ينسب لمصر، هل مطلوب من جمهور الزمالك إنه يشجع الأهلي؟ لأ، كل واحد حر يشجع الفرقة اللي هو عايزها، ولو الأهلي كسب النهارده احتفل بمكسبك وماتقعدش تقول أنا عملت أنا سويت، وفي البطولة دي الأهلي بيمثل أفريقيا.. فمش مطلوب مننا إننا نقول إن ده النادي الأهلي ودي مصر.. لأ اللي عايز يشجع يشجع”
في ناس شايفة إن موقف الهيئة من تصريحه زيادة، وناس شايفة إنه ماقالش حاجة يستحق عليها العقاب ده، وناس شايفة إن ده مش حيادي وإنه كده بينشر التعصب وإن هو بنفسه طلب قبل كده من الجمهور إنه يشجع الزمالك في الكونفدرالية وإن الزمالك بيمثل مصر!
رد الهيئة على التصريحات
نقابة الإعلاميين قررت منع ظهور حسام حداد على أي وسيلة إعلامية مصرية. لحد ما ينتهي التحقيق معاه. فيما هو منسوب إليه من مخالفات مهنية وقانونية ولميثاق الشرف الإعلامي ومدونة السلوك.
وإنه خالف نص المادة 9 اللي بتنص على الامتناع عن بث ما يغذي أو يكرث ثقافة العنف والكراهية. وخالف مدونة السلوك المهني في بندها العاشر اللي بينص على الامتناع عن إثارة الكراهية والتمييز والتحريض بكل أنواعه بين أطراف الشعب وفئاته.
رد حسام حداد على الهيئة كان إيه؟
جزء من تصريحه: أنا مشجع أهلاوي من الطفولة، وأحب النادي وأشجعه وأحترم رموزه ونجومه، لم أخفي انتمائي للأهلي في يوم من الأيام.
أنا مع كل نادي مصري يلعب ضد أي نادي خارجي بقلبي وعقلي. وده اللي على طول بدعوا له، وأنا قلت إن المشجعين لهم الحق في تشجيع الفرق اللي عايزينها. وأكدت على أهمية إننا نقف جانب منتخب مصر في تصفيات كأس العالم.