معروف عن منصة لينكد إن أنها للتواصل المهني ولعرض شغلك علشان تجر رجل أصحاب الوظيفة أو الـHR علشان يكلمك، بس اللي عملته المنصة في تحديثها الجديد إنها حبت تواكب اللي بيحصل في السوق دلوقتي وتدخل على سكة تطبيقات المواعدة أو زي ما بنقول عليها “Dating apps” وأضافت ميزة جديدة علشان تقرب الناس مهنيًا وعاطفيًا كمان وتوفق راسين في الحلال.
والمنصة بتعتبر الميزة اللي أطلقتها نقطة قوة في حد ذاتها، لأن الناس اللي هتتقابل على المنصة هيكون من الأساس جامعهم شيء مشترك متعلق بالاهتمامات المهنية، فزي ما بيقولوا كده هتلاقي لغة حوار مشتركة وأرضية يبنوا عليها ويبقى التقارب على المستوى المهني وكمان المستوى الشخصي من غير ما المصالح المهنية تضر، وتقدر تلاقي نصك التاني في الشغل وفي الحب.
الخاصية اسمها “LinkedIn Love” هتقدر من خلالها تحدد نيتك في ملفك الشخصي كـ #OpenToDM ولا لأ، وتشوف الموضوع هيسوقك لإيه، وبعيدًا عن الهزار في منطقية في الموضوع لأننا لو شوفنا هنلاقي أن معظم الناس اللي بتتجوز بيتعرفوا في الأساس من الشغل.
الغريب بقى إن المنصة دي كان باين أو لايق عليها كده من الأول ويمكن ناس كتير ماخدتش بالها، بس شوفنا حالات كتيرة من ناس بتحاول تتعرف من على المنصة وبيتعملهم بلوك، بس دلوقتي ماحدش هيبقى له حجة، كله بقى على عينك يا تاجر فالتعارف بقى بيتم بشكل مهني يا ولاد، وشوية شوية هيطلع لنا بتوع صناع المحتوى والتيكتوكرز يقدموا لنا نصائح في “كيف تصطادين عريسًا من على لينكد إن”.