بعد انفصال الأب والأم، في حالات كتير بيحوّلوا المشاكل اللي بينهم وبيدخلوا فيها أولادهم، وبيكونوا الأولاد محور رئيسي في النزاع بينهم وبيتم استخدامهم بطرق كتير علشان كل طرف يثبت للتاني إنه أقوى وإنه يقدر يتحكم فيه وفي الأولاد.. وبيتنسي وسط كل ده نفسية وصحة الأطفال اللي بيعيشوا المنازعات دي وبتأثر عليهم.
قانون الرؤية مفروض إنه بيحل المنازعات دي ويحفظ للطفل حقوقه ويبعده عن مشاكل الأب والأم، المادة رقم 20 من قانون الأحوال الشخصية بينص على إن حضانة الأم بتنتهي لما يبلغ الطفل 15 سنة، وبعدها بيخيّر الطفل في البقاء مع أمه لحد سن الرشد، وبيكون للأبوين الحق في رؤية الأبناء، ولو حصل مشاكل في تنظيم الرؤية، بينظمها القاضي.
كل ده -في بعض الحالات- بيكون وراه كلام كتير بيدور في الخلفية، الكلام ده بيتزرع في الأطفال ويأثر عليهم، زي ما شوفنا في الفيديو اللي انتشر بشكل كبير على السوشيال ميديا لطفل في وقت الرؤية، بيعامل والده بقسوة وبيرفض يعامله بطريقة كويسة وبيطلب منه فلوس بس، وده فتح باب المناقشة عن الشكاوي الكتير اللي بتتقال من ناس عايشين التجربة دي، وبيتساءلوا هل ممكن قانون الرؤية يتعدّل؟
#فيديو_كارثي بين أب وإبنه عند الرؤية بعد إنفصاله عن والدته وتركه لها لتربيه بعد حكم الحاضنة لها.
ارتقو فوالله لن يحصد هذا الخراب الا الاطفال?Posted by مكتب الاستاذ / حسام بحيرى المحامى on Saturday, January 28, 2023
في حالات كتير، بتمتنع الأم الحاضنة عن إرسال الأولاد لرؤية والدهم، وفي حالات تانية بيمتنع الأب نفسه من رؤية أولاده، وفي مطالبات بتعديل القانون لإنه ينص عقوبات فورية للأمهات اللي بتمنع أبنائها من رؤية آبائهم في يوم الرؤية، وكمان تعديل للآباء اللي بيمتنعوا عن الذهاب في موعد الرؤية، بحيث يتم إلزامهم برعاية الطفل ورؤيته بشكل إجباري.
تفتكروا ممكن القانون يتعدل؟ ولو اتعدل، تفتكروا المقترحات السابقة دي هتبقى حل؟
آخر كلمة: ماتفوتوش قراءة صندوق الأسرة المصرية: مبادرة رئاسية جديدة لدعم ضحايا الطلاق