لُقب بـ “دنجوان السينما” ويعتبر واحد من أكتر نجوم الشاشة جماهيرية في فترة الستينيات، رشدي أباظة عمل أفلام مميزة فضلت محفورة في تاريخ السينما لحد دلوقتي، وجزء كبير منها اتصنف ضمن أفضل 100 فيلم في تاريخ السينما. وفي يوم زيّ ده، فقدنا واحد من أهم صناع السينما في مصر، تعالوا نفتكر أهم أفلامه واللي اتنوعت بين أدوار الشر والكوميديا والتراجيدي، واللي لحد دلوقتي معلقة معانا.
الزوجة رقم 13
يعتبر من أشهر الأفلام الكوميدية في الوقت ده، واتقال عليه إنه فيلم “انتصر للمرأة”، وتم اختياره علشان يمثل مصر في مهرجان برلين السينمائي، وشارك رشدي أباظة في البطولة، الفنان عبد المنعم إبراهيم وشادية وشويكار، وكان سيناريو أبو السعود الإبياري وعلي الزرقاني، ومن إخراج فطين عبد الوهاب.
صغيرة على الحب
من أشهر أفلام رشدي أباظة وشاركته في البطولة سعاد حسني وسمير غانم وأخرجه نيازي مصطفى، وتم إنتاجه سنة 1966، الفيلم كان مقتبس عن مسرحية إدلر جونسون، والنقاد قالوا على الفيلم إنه من الصعب يتكرر عمل تاني بنفس مستوى صغيرة على الحب ولا بنفس الروح والخفة اللي كانت في الفيلم.
صراع في النيل
يعتبر واحد من أشهر أفلام المخرج عاطف سالم، اتعمل وهو لسه مخرج شاب، وقدر إنه يخرج للناس تلاتة من نجوم الصف الأول بشكل وأداء مختلف تمامًا عنهم، وكان على رأسهم رشدي أباظة واللي ظهر فيه بشكل وأداء بعيد تمامًا عن فكرة الدنجوان. الفيلم كان بيدور أحداثه في مدينة الأقصر في جنوب مصر، وتم إنتاجه سنة 1959.
الرجل التاني
قال عليه نور الشريف إنه شاف الفيلم ده “100 مرة”، يعتبر من أوائل أفلام الإثارة والتشويق في السينما المصرية، كان بيتكلم عن قضايا التهريب والجريمة بطريقة مبتكرة ماتعملتش قبل كده في صناعة السينما في الوقت ده بالتحديد، الفيلم كان مزيج مختلف بين أداء رشدي وأغاني صباح واستعراضات سامية جمال، كل ده عمل حالة مختلفة للفيلم.
أريد حلًا
بسبب مشهد في الفيلم ده، قرر الرئيس الراحل أنور السادات إنه يقوم بتعديل في قانون الأحوال الشخصية علشان تقدر الست ترفع قضية خلع وتحصل على حريتها، يعتبر أول فيلم ناقش قضية الخلع بمنتهى الجرأة ويتكلم عن الاضطهاد اللي بيقع على الست في حالة طلب الطلاق، الفيلم اتصنف في المرتبة الـ21 ضمن أفضل 100 فيلم في تاريخ السينما المصرية.