كل معجبين مارفل مستعدين لأحدث مسلسل هتنزله شركة أفلام الأبطال الخارقين يوم 31 مارس. ومسلسل Moon Knight بيقدم نفسه على إنه واحد من الأعمال اللي هتيجي بلمسات مصرية سواء من حيث قصة المسلسل اللي بتتكلم عن واحد من جنود المشاة البحرية الأمريكية السابقين “مارك سبكتور”، واللي عنده اضطراب نفسية Schizophrenia، وبعد كده بيمنحه إله القمر المصري “خونشو” قوى خارقة.
بيكتشف مارك إن القدرات دي ممكن تكون نعمة ونقمة في حياته اللي مليانة اضطرابات بالفعل. أما اللمسة المصرية التانية فكانت المخرج المصري محمد دياب اللي بيشارك في إخراج المسلسل مع تلات مخرجين تانيين هما: جاستن بنسون، وآرون مورهيد، وجورج كلوني.
وغير الإخراج أكد محمد دياب إن جزء من التصوير تم في مصر بالفعل وإن شاركه في عمل المسلسل المونتير المصرى أحمد حافظ، في الحلقتين الثالثة والرابعة، واحدة من إخراج دياب والتانية من إخراج الثنائي جاستن بنسون وآرون مورهيد. وبيظهر في إعلان المسلسل الرسمي مشاهد من مصر، وبالتحديد لمنطقة الأهرامات.
وتم اختيار الممثل إيثان هوك في دور الشرير في المسلسل المنتظر على منصة Disney Plus، وإيثان هوك هو الفنان اللي اترشح لأربع جوائز أوسكار، منهم اتنين عن فئة أفضل ممثل مساعد في فيلم “Training Day” و”Boyhood”.
قال محمد دياب في مداخلة تليفونية مع برنامج “حديث القاهرة”، اللي بيتذاع على فضائية “القاهرة والناس”، يوم السبت، إنه فاز مع زوجته سارة جوهر بإخراج مشروع المسلسل بعد تصفيات مع مخرجين أمريكان.
ووضح محمد دياب في تصريحات صحفية، إنه كان حريص على مشاركة صناع مصريين معاه غير المونتير أحمد حافظ، زيّ الموسيقار هشام نزيه، وريم العدل مصممة الأزياء ومهندس الديكور علي حسام اللي كانوا مسئولين عن الجزء اللي تم تصويره بمصر، وأكد إنه انتهي من تنفيذ المسلسل بتكلفة 160 مليون دولار.
في دور Moon knight أو “مارك سبكتور” تم اختيار الممثل الامريكي أوسكار أيزاك واللي اشتغل مع مارفل قبل كده في فيلم من أفلام X-men وعمل دور Apocalypto.
والمسلسل الجديد من إنتاج Marvel وDisney +، وأحداثه مبنية على بطل الكوميكس Moon Knight، وبيشتغل على كتابته الكاتب جيريمي سلاتر، اللي طور وكتب سلسلة نيتفليكس المقتبسة من الكوميكس The Umbrella Academy.