غير إنها بتعتبر من أعرق وأقدم مدن المغرب بس بيسموها العاصمة الروحية للمغرب، لإنها بتجمع عدد كبير من العلماء والحرفيين والأئمة والمزارعين، ده غير إنها مبنية على التراث القديم وأنت بتتمشى فيها هتلاقي ورش للحرفيين التقليديين والأبواب التقليدية اللي على شوارعها وكلها نقوش، ده غير إنها تاني أكبر مدينة خالية من السيارات في العالم، فلو حابب إنك تستجم بعيدًا عن الدوشة والتلوث، هتبقى مدينة فاس هي خيارك الأمثل.
أماكن تروحها وأنت هناك
مدرسة العطارين
اتأسست مدرسة العطارين سنة 1325. من أجمل المدارس الدينية الموجودة في المغرب. وبتتميز بالأنماط التقليدية والحرفية المحلية، وفيها كتير من ديكورات الجبس المزخرفة وديكورات خشب الأرز الفاخر. أمر بتشييدها السلطان المريني أبو سعيد عثمان ما بين 1323 و1325 م. وبيقال إنه أشرف شخصيًا على تأسيسها.
سوق الحنة
من الأسواق القديمة في المدينة، كانت مخصصة لبَيع مواد التجميل من الكحل ومياه الورد والصابون الأسود والحنة، وغيرها من المواد التجميلية. السوق ده بالتحديد بيدي اهتمام خاص بالحنة في المغرب وموجود في أكتر الساحات المميزة في فاس.
ومش بس الحنة اللي موجودة هناك. وأنت ماشي هتلاقي صفوف من التوابل والأعشاب، والصواني النحاسية والبلاط المصنوع بشكل يدوي وأنابيب المياه. والمجوهرات الفضية والكتب والألعاب والأواني الخشبية والعطور ومنتجات التجميل وأقفاص الطيور.
مدابغ الجلود
مدابغ الجلود بتعتبر من الوجهات السياحية المميزة في المغرب. وأقدم الحرف التقليدية هناك. أول لما تقرب من حي الدباغة هتشم ريحة جلود الحيوانات من شوارع المكان العتيق والأحياء الضيقة. لما تشوف المكان من فوق مع علب طلاء الجلود. هتحس إنك قدام فنان بيحضر علشان يرسم لوحة.
جامع القرويين
موجود جانب سوق العطارين في فاس بالي، وبيعتبر من أكبر المساجد في أفريقيا. اتأسس المسجد على إيد «فاطمة الفهري» بنت المهاجر الثري القيرواني سنة٢٤٢ ه. ممرات المسجد مصنوعة من أقواس حدوة الحصان بيدعمها حوالي ٢٧٠ رصيف. وبيحتوي على 5 قباب وفناء أزرق وأبيض.
لو روحت هناك هتاكل إيه؟
لو روحت هناك لازم تجرب الكباب البروشيت والطواجن على اختلافها، والنوجة والفستق السوداني المسكر والخبز المغربي، ولازم تجرب الزيتون المشهور هناك والشباكيّات والبسطيلة، وسلطة شلادا المغربية والرفيسا والحريرة.
المواصلات هناك عاملة ازاي؟
المواصلات العامة في المدينة متوفرة بس من الأحسن إنك تتمشى علشان تكتشف المكان، وفي عربيات ممكن تتأجر والشركات السياحية ممكن تأجرلك عجل تتفسح به في المدينة.
إيه هو أنسب وقت تروح فيه؟
أنسب وقت من شهر أبريل لشهر أكتوبر بتكون درجة الحرارة متوسطة وبتكون 38 في شهر أغسطس و14 في شهر يناير.
فنادق ممكن تقعد فيها
- فندق ومنتجع رياض العروسة.
- فاس ماريوت جنان بالاس.
- منتجع رياض دار بنسودة.
- فندق دار دور.
- بارسيلو فاس المدينة المنورة.
- رياض الياقوت.
- قصر أماني.
- فيلا أغابانثي.
مطاعم ممكن تاكل فيها
- لامندييه باليه فرج
- ذا روند جاردن
- داروري ريستو
- كافيه كلوك
- رياض لونا
- نجمة سوافين
- الحاج مامو
مدينة فاس هي الراعي الرسمي للاستجمام، ماتنساش وأنت رايح ترمي كل اللي بتفكر فيه ورا ضهرك وتتبسط وتسترخي، وتاخد صور حلوة تفضل معاك على طول.