مدينة سياحية في تبوك في السعودية، تُعتبر موطن للسياح اللي بيحبوا التنوع لإنها بتجمع بين تضاريس طبيعية جميلة، ومجموعة كبيرة من الشواطئ والجزر، وكمان المعالم الأثرية والتراثية، علشان كده بتجذب السياح بمختلف اهتماماتهم. ده غير خطة المملكة لمدينة صديقة للبيئة، ورؤية “مشروع نيوم” اللي بيُعتبر انطلاقة التغيير للمستقبل والاستدامة، والمشروع يُعتبر واحد من المشاريع الكبرى لصندوق الاستثمارات العامة في المملكة. حبينا نتكلم عن أجمل معالم سياحية فيها.. وكمان عن خطة المملكة لنيوم علشان تكون مدينة صديقة للبيئة.
عن مشروع نيوم، بيتم تعريفه بـ: “مشروع نيوم، هو حلم جريء وطموح لمستقبل جديد، وهو انطلاقة التغيير التي ستجسِّد مستقبل الابتكار في الأعمال والمعيشة والاستدامة. وتمثل نيوم أحد المشاريع الكبرى لصندوق الاستثمارات العامة.”
“أقدم لكم “ذا لاين”، مدينة مليونية بطول 170 كم تحافظ على 95% من الطبيعة في أراضي نيوم، صفر سيارات، صفر شوارع، وصفر انبعاثات كربونية”، صاحب السمو الملكي الأمير محمد بن سلمان، ولي العهد ورئيس مجلس إدارة شركة نيوم، في بيان صحفي
رؤية المملكة 2030 بتضم مشروع نيوم اللي بيهدف لإنشاء منطقة استثمارية تجارية وصناعية على الساحل الشمالي الغربي من البحر الأحمر بيحمل اسم “نيوم”. ومن التصورات، المدينة هتكون: “شواطئ مضيئة تتوهج في الظلام، مليارات الأشجار في بلد تهيمن عليه الصحراء، قطارات سككها معلقة في الهواء، قمر مصنع، مدينة خالية من السيارات وخالية من الكربون مبنية على خط مستقيم يزيد طوله عن 100 ميل في الصحراء. هذه بعض خطط نيوم، وهي مدينة مستقبلية تشكل جزءًا من توجه المملكة العربية السعودية لتصبح صديقة للبيئة”، زيّ ما اتنشر في مقال BBC.
وغير النقلة الحضارية المنتظرة في خطة 2030، نيوم مشهورة بأماكن سياحية مختلفة، بتضم أنواع مختلفة من السياحة؛ يعني لو بتحب الاستكشاف والآثار، أو بتحب الاسترخاء والاستجمام على الشواطئ، أو الصحاري والسفاري، كل أنواع السياحة دي هتلاقيها في نيوم.
جزر نيوم
من أجمل جزر البحر الأحمر، ممكن تستمتع بالشواطئ هناك بأنشطة هادية، منهم السباحة والغطس والرياضات المائية. ده غير إنك لو بتحب الاسترخاء على الرمال البيضاء، جزر نيوم هي وجهتك المثالية، وفيها حياة برية نادرة، من جزيرة يبوع، اللي بتتميز بالتعرجات المهيبة، لجزيرة سندالة.
صحراء حسمى
واحدة من أقدم الصحاري في المملكة العربية السعودية، وبيرجع تاريخها لآلاف السنين، وبتضم مجموعة من التكوينات الصخرية والنقوشات، وفيها كمان مجموعة من المنحدرات الشاهقة بيزيد ارتفاعها عن 100 متر. والصحراء دي تعتبر رابط وثيق بين العرب وأجدادهم، اللي بيتعرفوا بيها على تفاصيل حياتهم من خلال النقوشات الصخيرة الموجودة في صحراء حسمى.. لو أنت من محبين الاستكشاف والمناطق الأثرية، المكان ده وجهتك.
وادي طيب اسم
بتدفق المياه من غير توقف، بيتميز وادي طيب اسم في نيوم كواحد من الأماكن المثالية للمشي مسافات طويلة، غير الغطس والسباحة في مياه نقية بشكل طبيعي زيّ الصورة، واكتشاف الحياة البحرية والحيوانات والبرمائيات، وكمان الطيور والزواحف في الوادي.
أرض مدين ومغاير شعيب
الأرض اللي عاش عليها سيدنا موسى عليه السلام، وجبالها عليها آثار بترجع للقرن الـ 12. أما مغاير شعيب اتسمت بالاسم ده من الحجاج، وده نسبة لنبي الله شعيب عليه السلام، اللي كان ساكن فيها. هتقدر تكتشف فيها آثار الأماكن اللي كانوا عايشين فيها، لو بتحب الاستكشاف والأماكن التاريخية.
شاطئ قيال
رمل ذهبي، بين المياه الزرقاء الصافية على شاطئ البحر الأحمر، مع أشجار النخيل العالية، شاطئ قيال يعتبر من أجمل السواحل على البحر الأحمر، واللي ماتدخلتش فيه الإيد البشرية ولسه بطبيعته لحد دلوقتي.