كلمة “حدث بالفعل” ليها مفعول السحر عند المشاهدين لإنهم بيتهيأوا نفسيًا لأي حاجة هتحصل في الفيلم باعتبارها حصلت على أرض الواقع وقبل ما تشوفها متجسدة قدامك، وكتير من المخرجين بيعتمدوا في صناعتهم للأفلام على قصص حقيقية ويضيفوا عليها رؤيتهم الإخراجية مع الحبكة الدرامية. ولإن الأنواع دي من الأفلام بتشد الناس، حبينا نتكلم عن مجموعة من الأفلام المصرية اتبنت على قصص حقيقية..
أسماء
الفيلم تم إنتاجه سنة 2011 وعمل رد فعل واسع عند الجماهير لإن كان أول مرة يتطرح موضوع مرض الإيدز في فيلم أو مسلسل وبالجرأة دي، واتكلم عن نظرة المجتمع لأصحاب المرض والمشاكل اللي بيعانوا منها. الفيلم ده مستوحى من قصة حقيقية لست بتعاني من نفس المرض، ومن ضمن أحداثه ظهر مجموعة من المرضى علشان يحاولوا يغيروا نظرة المجتمع ليهم.
حدوتة مصرية
ناس كتير ماكانتش تعرف إن فيلم حدوتة مصرية كان بيحكي عن قصة حياة المخرج يوسف شاهين، بس الفرق إنه حكاها وهو لسه عايش، لما قرر إن بطل الفيلم اللي يمثل دوره هو نور الشريف، يعني ماكانتش مجرد سيرة ذاتية اتعملت عنه علشان تخلد اسمه، لأ دي القصة كلها اتحكت على لسانه وهو لسه عايش.
تيتو
الفيلم بيتكلم عن طفل كبر داخل مؤسسة إصلاحية بسبب ارتكابه لجريمة قتل وبعد ما يسيب المكان ده، يقرر إنه يعمل عصابة إجرامية للسرقة والخطف لصالح ضابط شرطة فاسد، وفي لقاء صحفي لأحمد السقا قال إن فكرة الفيلم اتولدت من حوار صحفي عمله الإعلامي مفيد فوزي مع واحد من نزلاء الإصلاحية فقرروا إنهم يتبنوا القصة دي ويضيفوا عليها الحبكة الدرامية.
النمر الأسود
فيلم بيحكي عن شاب مصري قرر يسافر ويبني مستقبله بس هيواجه مشاكل منها صعوبة الحياة والعنصرية اللي هيتعرض لها، لحد ما يقرر مدرب ملاكمة إنه يتباه رياضيًا ويعمل منه بطل في الملاكمة، وده اللي حصل فعلًا مع الملاكم المصري محمد حسن المصري المحترف في ألمانيا واللي حقق بطولات كتيرة واسمه لسه بنفتكره كل ما بنشوف الفيلم.
الجزيرة
الفيلم تم إنتاجه سنة 2007 وبيتكلم عن رحلة واحد من أباطرة تجارة السلاح والمخدرات في الصعيد، وأحداثه كانت مستوحاه من قصة “عزت حنفي” واللي فرض سيطرته على جزيرة النخيلة واتعرف وقتها إعلاميًا باسم “إمبراطور النخيلة” واللي تم القبض عليه في 2004 وتم إعدامه سنة 2006.