ناس كتير بتتابع صفحة BadrContent أو بضر كونتنت على الإنستجرام، وبينقسم جمهور اللي بيتابع فيديوهات الصفحة ما بين جانب من العاشقين اللي مش بيشبعوا من المحتوى العبثي اللي بعضه مضحك جدًا وبعضه مثير للاشمئزاز، وجانب آخر بيشوف إن الصفحة بتخلق بيئة للتنمر من خلال نشر فيديوهات الآخرين بغرض السخرية والاستهزاء.
اتقابلنا مع المسؤولين عن الصفحة؛ أدمن 1، وأدمن 2، علشان نناقش معاهم التهم الموجهة لهم وأهدافهم من إدارة الصفحة.
بتجيبوا المحتوى اللي بتنشروه منين؟
أغلبه من تيك توك وكام صفحة على فيسبوك فيهم محتوى كويس، البعض من يوتيوب أو تويتر أو Kwai كواي.
قصدك إيه بمحتوى كويس؟ إيه هي المعايير المطلوبة في الفيديو اللي بيتم نشره عندكم؟
أدمن 1: مفيش معايير محددة، احنا عايزين فيديوهات بضر، يعني مختلفة وغريبة عن شكل الواقع المصري اللي بيتم تصديره لينا في الإعلام طول الوقت، جزء مهم في الفيديو إنه يكون قادر على جذب الانتباه، بس مايكونش مثير للاشمئزاز أوي.
أدمن 2: غالبًا بختار ناس متهورة مش بيفرق معاهم حاجة قدام الكاميرا، ناس هوبة يعني. بحب الحاجات الغريبة والملفتة للنظر والهستيرية.
معظم الناس فاكرة إن الصفحة اسمها بدر كونتنت، بس الاسم الحقيقي هو بضر! يعني إيه بضر؟
أدمن 2: أنا الأول برضه كنت فاكر إن اسمها بدر كونتنت وكنت بقول لأدمن 1 يا بدر، بس هو اللي قالي على موضوع بضر ده.
أدمن 1: بضر كلمة مصرية أصيلة معناها فضيحة، أو الحاجة المبالغ فيها والمستفزة، وأنا اخترت الاسم ده علشان بيمثل المحتوى اللي بجمعه عندي في الصفحة بشكل دقيق.
من أهم الفيديوهات اللي بتنزلوها واللي الجمهور بيحبها هي أفراح المنصورة، هل دي فعلًا فيديوهات من أفراح المنصورة؟
أدمن 2: أه، احنا بنجيب الفيديوهات دي من جروبات فيسبوك اسمها حرفيًا أفراح المنصورة، وعندنا معارف في المنصورة أحيانًا بيصوروا لنا فيديوهات مباشر وبيبعتوها لنا.
اشمعنى أفراح المنصور؟
أدمن 2: علشان اللي بيحصل فيها مختلف تمامًا عن الصورة الوهمية اللي بيتم تصديرها لينا عن المجتمع المصري، وبتوضح حقيقة الواقع المصري اللي فيه راقصات درجة تانية. ولو شفت فيلم “وفي الليل يرقصن” هتعرف إن الراقصات دول واقعهم مزري وبيتم استغلالهم، ولازم نُلقي الضوء على واقعهم وشغلهم.
هل نشر محتوى الآخرين عندكم يُعتبر شيء أخلاقي؟
أدمن 1: ماعنديش رد معين على السؤال ده، بس كل اللي أقدر أقوله إننا مش بنقصد نأذي حد، والدليل على كده إن مفيش عبارات أو وصف يجرحهم أو يؤذيهم. غير إن المحتوى اللي بننشره عندنا بيكون منشور عام على صفحاتهم، وبالتالي لم نعتدي على خصوصية أي حد علشان تكون في شبهة غير أخلاقية.
احنا بس بنقدم محتواهم بطريقة أحلى وألطف، وعندنا معيار أخلاقي إن أي حد بيتضايق من وجود الفيديو بتاعه عندنا بنمسحه فورًا، لإن هدف الصفحة هو الترفيه عن الناس والتخفيف عنهم مش إننا نأذي حد.
إيه ردود الفعل اللي بتييجي لكم على الفيديوهات دي سواء في التعليقات أو في الرسائل الخاصة؟
أدمن 1: ردود فعل متنوعة، ما بين ناس مبسوطة وبتضحك سواء في التعليقات أو الرسائل الخاصة ، وما بين ناس عندها حالة اندهاش من اللي بتشوفه.
البعض قد يجادل إنه حتى لو الناس عاملة الفيديوهات دي عامة إلا إنكم بتخلقوا بيئة للتنمر عليهم، إيه ردكم؟
أدمن 2: مش هسميها تنمر، احنا بنشارك حاجة مختلفة في محاولة لكسر جمود المجتمع. احنا بنشارك جانب مش متشاف من الوطن العربي، عندنا راقصات درجة تانية بيتعرضوا لأبشع أنواع الاستغلال واحنا بنسلط الضوء عليهم، وعندنا ناس مش فارقة معاها حاجة وبتعمل اللي هي عايزاه، وإحنا بننزل فيديوهات الناس دي لإننا فعلًا بنحبهم وبنحترمهم، وبيضحكونا.
لما بشوف المحتوى بتاعكم بحس إني بتفرج على مجتمع إلكتروني عميق Deep web!
أدمن 2: اللي احنا بننزله فعلًا هو مجتمع إلكتروني عميق Deep web، وإحنا بنركز على فيديوهات مش هتشوفها في واقعك اليومي العادي على السوشيال ميديا.
ازاي المحتوى بتاعكم بيبن جانب مختلف من المجتمع العربي؟
أدمن 2: احنا بنحاول نبين جانب مش متشاف في مصر، وبنحاول نخلي الناس تعتاد وجود حاجات عليها تابو، ومش طول الوقت بيكون المحتوى بتاعنا بغرض الهزار، في أوقات كتير بنستغل الصفحة في إننا نُلقي الضوء على قضايا عنف أسري وعنف قائم على أساس النوع الاجتماعي.
أدمن 1: بنحاول طول الوقت نُلقي الضوء على فئات من العرب اللي المجتمعات بتنكر وجودهم، وبعض الفئات دي بتمارس المجتمعات ضغط كبير عليهم علشان تخفي وجودهم. المحتوى الخاص بالفئات دي بيوصل عليه أكبر عدد من البلاغات، بس احنا مش متوقعين إن كل الناس تحب أو تتقبل أو حتى تفهم المحتوى اللي إحنا بنقدمه، وزيّ ما مكتوب في البايو “بضر كونتنت لمن يجرؤ فقط”.
إيه ردكم على اتهام إنكم بتشوهوا صورة الواقع المصري؟
أدمن 1: احنا بننقل ظواهر موجودة في كل المجتمعات مش المجتمع المصري بس، الفكرة إننا بننقلها بشكل كوميدي، وبشكل خفيف، وبتوصل للناس بصورة كويسة، يعني محتوى يبيّن حاجات فعلاً موجودة في المجتمع، بس المهم يكون كوميدي.
أدمن 2: بنشوه الواقع المصري ازاي؟ ادخل على تيك توك وقلب بشكل عشوائي هتلاقي محتوى مشوه طول الوقت، احنا بنجيب الفيديوهات دي من قلب السوشيال ميديا العربية، ومش بنركز على طبقة اجتماعية معينة أو بلد عربي دون سواه.
إيه الدافع لإنشاء الصفحة من الأول؟
أدمن 1: الحوار بدأ لما كان عندي اكتئاب وضغوطات حياة كتيرة.. فقررت إني أمزج المحتوى اللي بحبه على السوشيال ميديا مع خلفيتي عن المحافظات والأفراح وما إلى ذلك في إني أعمل محتوي كوميدي للناس اللي بتواجة ضغوطات يومية. كنت عايز شيء ترفيهي لطيف وسريع يخفف اليوم على الناس، وفي نفس الوقت أخفف الضغوطات من عليا وتكون ملجأ ليا أقدر أطلّع طاقتي وأفكاري.
أدمن 2: أنا عندي موهبة اعرف ازاي اختار فيديو غريب وقادر على جذب الانتباه، وبالتالي كانت الصفحة دي ملجأ لطاقتي وأفكاري وللمحتوى اللي بحبه على السوشيال ميديا.
لو عملت فيديو ونشرته للعامة وأخده شخص تاني ونشره على صفحته وجمع صحابه علشان يهزروا ويضحكوا عليه، هتحس بإيه؟
أدمن 2: أكيد هتضايق، بس احنا دايمًا بنشيل الفيديو لو حد اتضايق وطلب مننا نشيله.