فيديو منتشر من فقرة في برنامج، بيتكلم عن يوجا الضحك وبيدربوها بشكل مباشر، وطبعًا الناس نشرت الفيديو وبطريقتها الساخرة على السوشيال ميديا، والناس ضحكت كالعادة، والفيديو لو شوفته بطريقة عشوائية كده هتضحك فعلًا، بس اللي ناس كتير ماتعرفوش إن في حاجة اسمها “يوجا الضحك” فعلًا، دي حاجة حقيقية وعلم يعني مش حاجة مضحكة. فدي فرصة نعرف إيه الرياضة دي.
عارف لما تتفتح في نوبة ضحك كده واللي حواليك لما يبصوا لك يضحكوا معاك حتى لو مش عارفين سبب الضحك أصلًا، بس تلقائي لما بنشوف حد بيضحك قوي بنضحك معاه لا إراديًا، أهو رياضة يوجا الضحك حاجة بتعتمد على الأسلوب ده تقريبًا.
وباللغة العلمية، يوجا الضحك هي ممارسة فريدة من نوعها بتجمع بين الضحك غير المشروط، والتنفس اليوجي.
وحسب اللي تم نشره على موقع “هيلث سايت“، أي شخص ممكن يضحك من غير ما يعتمد على الفكاهة أو النكت، وفي بداية التدريب بيقوم الشخص بمحاكاة الضحك مع الحفاظ على النظر للناس اللي معاه في المجموعة المتدربة، علشان يشجعوا بعض، وده بيؤدي للضحك الحقيقي.
جلسات يوجا الضحك بتبتدي بتسخين خفيف بيكون عبارة عن تمدد للجسم وتصقيف مع تحريك الجسم، وبيتم استخدام تمارين التنفس علشان الرئتين يستعدوا للضحك، وبعد كده بتبتدي سلسلة “تمارين الضحك” ودي بتجمع بين طريقة التمثيل وتقنيات التصور، يعني تخيل حاجات تضحك.
الجميل إن أي حد ممكن يُمارس رياضة يوجا الضحك، مش بتشترط حالة صحية معينة أو أي حاجة، أي شخص مهما كان سنه أو حالته الصحية أو لياقته البدنية يقدر يعمل تمارين الضحك، وكمان مش بتشترط إنك تلبس لبس رياضة معين مثلًا، أنت كل اللي محتاجه مجموعة من الناس، ومساحة تقعدوا فيها. وكمان من مميزات الرياضة دي إنك هتحس بتأثيرها فورًا، مش زيّ العضلات اللي بنقعد سنة نستناها تطلع.
يوجا الضحك ليها فوائد، زيّ إنها بتحسّن الصحة لإن الضحك بيقلل الإجهاد وبيقوي جهاز المناعة، ده غير إنه بيحسّن الحالة المزاجية في خلال دقايق، وده عن طريق إنه بيحفز إفراز الإندورفين وده بيدي إحساس بالبهجة على مدار اليوم. كمان بيدي الشخص طاقة، لإن تمارين الضحك بتزوّد صافي إمدادات الأكسجين للجسم والدماغ، وده بيساعد على تحسين أداء الجسم وبيدي شعور بالحيوية.
ومن أهم الفوائد اللي حابين نبروزها لوحدها إن تمارين اليوجا بتعوّد الشخص إنه يضحك من غير قيود أو شروط، لإن في العادي الإنسان بيضحك لما يكون في داعي للضحك بس. لكن بالتعوّد وتمارين الضحك، الشخص هيكون عنده نظرة إيجابية وقت المشاكل وعقله هيحافظ على موقف إيجابي بغض النظر عن الظروف اللي بيمر بيها، يعني هيشوف الحاجة بشكل مختلف وإيجابي أكتر، ده غير إن يوجا الضحك بتزوّد القدرة على العمل.
شايف أخر جملة في الفقرة اللي فاتت؟ اقترحنا إننا نعمل تمارين الضحك في بداية كل يوم في الشركة قبل ما نبدأ نشتغل، وهنبقى نقولكم إيه النتيجة.