احتدمت حالة جدل كبير على منصات السوشيال ميديا الجزائرية خلال اليومين اللي فاتوا، بعد انتشار صور فرح لراجل معاه عروستين. معظم التعليقات على الخبر جات في حالة من الاستغراب والذهول.
وضحت التقارير الصحفية الجزائرية إن العريس العشريناتي اللي اسمه “رشيد بوديوة”، من مدينة سكيكدة، عاصمة الولاية اللي تحمل نفس الاسم والموجودة على سواحل البحر المتوسط، عمل فرح ضخم جمع فيه بين عروستين.
انتشرت أخبار الفرح على السوشيال ميديا، مع انتشار صور رشيد مع العروستين اللي وقفوا جنبه بفساتين بيضاء، في الوقت اللي تشارك أهل رشيد والعروستين الفرحة مع الأطراف التلاتة في الفرح.
من الصور اللي انتشرت بشكل كبير على السوشيال ميديا وسببت ضجة كانت صورة الدعوة للفرح، واللي كان فيها اسم العريس رشيد، وأسماء العروستين حنان ومريم.
كانت من أهم الأسئلة اللي طرحها رواد منصات السوشيال ميديا ومختلف مواقع الإنترنت الجزائرية هو ازاي قدر رشيد يُقنع اتنين ستات يوافقوا على فرح يجمعهم هما الاتنين، في الوقت اللي وصف فيه الناس الفرح بالإجراء الغريب.
وضح رشيد الموقف للجماهير من خلال رسالة قال فيها: “ماكنتش اعرف إن جوازي هيسبب الضجة الكبيرة دي. الحمد لله لإني قصدت الحلال وجوازي كان أمام الله وعباده، وماكنتش عندي أي نية في الشهرة أو الإساءة للنساء أو أي طرف”.
وأضاف بوديوة: “الرضى كان هو أساس الجواز ده. ومايخفاش عليكم الصعوبات اللي واجهتها لإقامة فرح بسيط”، وأشار: “كان مجرد إني ألاقي مكان أو فندق علشان أعمل الفرح من سابع المستحيلات. شخصيًا كان كل همي إن الفرح يمر بسيط على خير وعلى قد الحال مع الضغوطات لأخر دقيقة، والحمد لله اللي وفقني وأعزني أمام كل خلقه”.
علق رشيد على ردود الفعل السلبية اللي اتوجهت لشخصه على السوشيال ميديا: “الكلام إني شخص غني، وعلشان كده قبل اتنين ستات يتجوزوني مش حقيقي، أنا ماعنديش سكن خاص بيا، زيّي زيّ كل الفئة البسيطة في المجتمع”، وأضاف: “الغنى غنى النفس والهمة”.
وتابع رشيد: “اللي قال إن والدتي هي اللي جوزتني غلطان، لإني مؤخرًا فقدت والدي ووالدتي اللي لطالما تمنيت إنهم يحضروا فرحي، فأمي توفت وهي توصي بزواجي. تزوج يا رشيد.. تزوج يا رشيد والحمد لله كنت بارًا بوالدي ربي يرحمهما و يسكنهما الفردوس الأعلى”.