الواقعية كانت البطل الأساسي لمسلسل الهرشة السابعة زي ما الناس قالت، حتى في الموسيقى التصويرية للمسلسل حسينا بالواقعية وإنها غير متصنعة وممكن حتى ماتحسش بيها، مافيش مشهد هتحس فيه إن الموسيقى بتجبرك على مشاعر معينة، بالعكس، هتلاقيها ماشية في خط بيوازي الآداء الحقيقي للممثلين. علشان كده المسلسل وصل للمشاهدين بكل مشاعره الحقيقية.
اتكلمنا مع الموسيقار خالد الكمار، اللي قام بتأليف الموسيقى التصويرية للمسلسل، وحبينا نعرف أكتر عن كواليس تأليف الموسيقى وازاي عملها بأسلوب “السهل الممتنع”.
عن واقعية الموسيقى قال: “الشغل مع كريم الشناوي، مخرج العمل، بيكون دايمًا له طابع مختلف، لإنه من ناحية هو شخص مثقف جدً موسيقيًا، ومن ناحية تانية هو شخص بيكون مُحدد جدً في اللي هو عايزه وعارف هو عايز إيه بالظبط. بيبقى متخيل الصورة النهائية للعمل، وأول ما اتكلمنا عن الشغل في (الهرشة السابعة) قال إنه عايز الموسيقى تكون غير مباشرة. عايز كل حاجة تبقى واقعية، لو الموسيقى بتشاور على مشاعر معينة هتقلل من الواقعية المتناغمة في المسلسل كله.”.
وعن الاختيار الصعب بين وضع موسيقى من عدمها في مشاهد معينة، زي مشهد مواجهة آدم ونادين اللي الموسيقى فيه دخلت بعد ما خلصوا كلام وكإنها بمثابة إن هما والمُشاهدين ياخدوا نفس بعد المعركة. هنا قال:”معظم الموسيقى اللي في المسلسل بسيطة جدًا، وفي مشاهد كتير مش حاطين موسيقى أصلًا، واللي ساعدنا في ده إن الكتابة حلوة جدًا والتمثيل حلو جدًا، المشاهد كلها مش محتاجة موسيقى تسندها، فممكن في بعض المشاهد نختار عدم وجود موسيقى فيها ونسيبها لباقي العناصر”.
وكمل: “البساطة والواقعية في المسلسل وفي الموسيقى مش معناهم إننا اختارنا الطريق الأسهل، أوقات في مشاهد الموسيقى بتدخل هي اللي تسيطر على المشهد وبتكون قوية، لكن المشاهد دي مش كتير ممكن يبقى مشهد كل حلقة أو كل حلقتين لكن معظم المسلسل استخدمنا فيه نسخة مبسطة من الموسيقى اللي حبينا نعملها”.
لحد دلوقتي في مشاهد الموسيقى بتاعتها لسة بتتطبخ، علشان كده حبينا نعرف إيه فرق الشغل دلوقتي بالنسبة للكمار، وهو بيشوف آراء الناس وتعليقاتهم على المسلسل وخصوصًا الموسيقى، وبين الشغل في باقي المسلسل قبل عرضه. وهنا حكى لنا: “دلوقتي شغال على حاجات في المسلسل بس يعتبر شغل على لمسات أخيرة، بس طبعًا الشغل دلوقتي بعمله وأنا نفسي مفتوحة ومرتاح، غير الشغل قبل عرض المسلسل كنت قلقان ومش عارف الناس هتستقبله ازاي. لكن دلوقتي كلنا حاسين إننا عملنا اللي علينا والناس راضية عن العمل”.
قولوا لنا إيه أكتر مشهد حبيتوا الموسيقى فيه؟
آخر كلمة: ماتفوتوش قراءة: عن آدم ونادين في الهرشة السابعة: لو اختلفنا ممكن نتطلق بالمعروف