أطلقت هيئة التراث السعودية مهرجان “نقوش” في واحد من أهم معابر الحضارات، ميناء العقير التاريخي أول بوابة اقتصادية لجزيرة العرب وأول وأقدم ميناء في المملكة، لتعريف الزوار على كنوز من التراث في تجربة مليانة بالفعاليات والأنشطة والعروض الحية للأنشطة التجارية القديمة، وبمجسمات تراثية وزخارف وفنون تراثية هتكون بوابتك لتاريخ الميناء العريق ده.
ولإنه واحد من أهم المعالم التاريخية في المملكة، بيتم حاليًا تكثيف الجهود المتواصلة لتحويل الميناء لمنطقة جذب سياحي. طب إيه هي أهمية الميناء؟
تاريخ الميناء
قبل اكتشاف البترول في السعودية، كان العقير هو الميناء الرئيسي للمنطقة الشرقية وجنوب ووسط نجد، ولحد دلوقتي بعض الآثار لسه موجودة هناك، وكان ميناء العقير أهم وسيلة اعتمد عليها الحكام العثمانيين في الاتصال بالسلطة المركزية، علشان كده كان له عناية واهتمام بشكل أكبر.
الملك المؤسس عبد العزيز آل سعود اهتم بميناء العقير، لكونه البوابة الاقتصادية للدولة السعودية الناشئة، والميناء الرئيسي في شرقي البلاد، وكمان لإنه شهد أحداث سياسية واقتصادية في عهد الملك عبد العزيز، لإنه استخدمه مقر لمقابلة الموفدين البريطانيين، واتخذه مقر للمفاوضات مع الحكومة البريطانية، وشهد الميناء توقيع الملك عبد العزيز معاهدة تعترف فيها بريطانيا بحكم الملك عبد العزيز للأحساء.
ولأكتر من 100 سنة، ميناء العقير التاريخي فضل على شواطئ الخليج العربي، وبيرجع تاريخ بنائه لسنة 960 ميلادي، وموجود في محافظة الأحساء في شرق السعودية، ويعتبر أقدم ميناء بحري في تاريخ السعودية، وكان الميناء الرئيسي للحضارات المتعاقبة في الأحساء لحد وقت قريب.
بين التاريخ والمستقبل
لو الصورة اللي اتكونت دلوقتي في خيالك عن الميناء إنه مجرد مكان عتيق هنروحه لو حابين نعرف التاريخ بس، يبقى الصورة دي غلط، لإن الميناء لحد دلوقتي محتفظ بجماله وموقعه، شاطئ رملي بطول الساحل بأشكاله المتعرجة، بشكل طبيعي جميل زي أي منتجع سياحي بنسافر له، علشان كده فكرة المهرجان في المكان ده هتحيي التراث، لكن كمان باللي يتناسب مع عصرنا واحتياجات الزوار والسياح.
مهرجان نقوش
المهرجان فعالياته بتشمل عروض حية بتجسد حياة الميناء، وفعالية نحت المجسمات التراثية والزخارف الأحسائية من الرمال، وورشة عمل قوالب تراثية رملية للأطفال، وفعالية “التقط الذكرى مع التراث”، ده غير عروض الفلكلور التراثي البحري، ومعرض تاريخ العقير.
ومن أهم فعاليات المهرجان كانت عرض مسرحي تفاعلي لميناء العقير القديم، من إخراج د. قاسم القدة، واللي اتقدم بشكل تفاعلي ومباشر قدام الزوار لتعريفهم بتاريخ الميناء وما كان عليه زمان، من بداية رحلة المركب، وإيه اللي ممكن يحصل داخل البحر، لحد ما توقف السفن المحملة بالبضائع، يعني العرض هياخدك في رحلة السفن من أولها لآخرها كإنك كنت عايش وقتها.
في عروض وفعاليات المهرجان، هتشوف في رحلة ترجعك 100 سنة ورا، أهمية الميناء تاريخيًا وجغرافيًا وازاي كان بيشكل أهمية اقتصادية للمملكة مع كل البلاد اللي حواليها، أهمية استراتيجية واقتصادية وكمان تراثية هتشوفها في المجسمات والعروض اللي بيشارك فيها أهل الأحساء لإحياء تاريخ ميناء العقير وتراثه.